Tiranë, 5 Prill 2014 NOA.al – Këngëtari dhe kantautori Flori Mumajesi, ka fituar një proces gjyqësor të ngritur në Këln të Gjermanisë, duke triumfuar ndaj kompanisë “Acromax”, pas konfliktit mes tyre mbi të drejtat autoriale në Youtube.

Kompania “Acromax”, ka menaxhuar deri para pak muajsh të drejtat e tij autoriale të Mumajesit në “Youtube”.

Vendimi i Gjykatës gjermane, që më poshtë e gjeni të plotë, flet në favor të Mumajesit.

VENDIMI I PLOTË NË SHQIP DHE GJERMANISHT

Gjykata e Këlnit në Gjermani vendosi ndalimin e menjëhershëm të bllokimit që “Acromax” ka bërë ndaj kanalit “Threedtos Production” në “Youtube” gjatë gjithë kësaj kohe, si dhe ndalimin e menjëhershëm të çdo përdorimi dhe shfrytëzimi mbi veprat e Mumajesit, për më shumë se 300 këngë, nga “Acromax” ose siç shumica i njohin, Aldor Nini, Anxhela Faber apo “Arkiva Shqip”. Në rast se këto shkelje vazhdojnë. “Acromax” do të gjobitet deri në 250 mijë Euro, ose 6 muaj ndalim/arrest.

Flori Mumajesi: E vërteta ime

“Kam heshtur gjatë, sepse nuk më pëlqen të flas kuturu. Edhe kur është shpifur për mua, nuk kam thënë asgjë… Pasi prisja këtë moment dhe në këtë moment dua të them pikërisht këtë:

E kam thënë dhe në një deklaratë të mëparshme, që askush nuk duhej të përfshihej në një situatë të cilën do ta ndiqja ligjërisht. Në respekt të asaj deklarate kam qëndruar i heshtur gjithë këtë kohë, në lidhje me diçka e cila më ka shqetësuar shumë, dhe më besoni, ka qenë shumë e vështirë të rrija kaq i qetë… I heshtur, por sigurisht, i vendosur kam ndjekur të gjithë rrugët ligjore për të kërkuar diçka e cila është e patjetërsueshme…është e drejta ime.

Ashtu si çdo muzikant, tekstshkrues, interpretues, performues dhe autor, duhet ta mbroj këtë të drejtë pa kompromise, askush nuk mund ta vjedhë dhe askush nuk mund ta marrë me dhunë. Mbi këto parime themelore, në dukje kaq të thjeshta, por ndonjëherë shumë të komplikuara për t’i mbrojtur, zyra ligjore e cila më ka përfaqësuar ka arritur të marrë në dt. 25.03.2014 vendimin nga Gjykata e Këlnit në Gjermani. Në këtë vendim, gjykata është shprehur në favorin tim, duke vendosur:

1. Ndalimin e menjëhershëm të bllokimit të padrejtë që “Acromax” ka bërë ndaj kanalit “Threedtos Production” në “Youtube” gjatë gjithë kësaj kohe;

2. Ndalimin e menjëhershëm të çdo përdorimi dhe shfrytëzimi mbi veprat e mia, për më shumë se 300 këngë, nga “Acromax” ose siç shumica i njohin, Aldor Nini, Anxhela Faber apo “Arkiva Shqip”;

3. Në rast se këto shkelje vazhdojnë “Acromax” do të gjobitet deri në 250 mijë Euro, ose 6 muaj ndalim/arrest.

Siç e kam shprehur edhe në deklaratën e parë, kur kjo çështje ka filluar, nuk kam pasur (dhe s’kam për të pasur kurrë) qëllim të dëmtoj në asnjë lloj mënyre, kolegët, shumë prej të cilëve janë edhe miqtë e mi. Por, njëkohësisht shoh me shumë keqardhje sesa të papërgjegjshëm janë personat të cilët shfrytëzojnë veprat e mia dhe të kolegëve e miqve të mi, edhe pas këtij vendimi gjykate, duke vazhduar të kryejnë shkelje, duke thyer ligje dhe vendime të gjykatave kombëtare (pa harruar këtu edhe dy kallëzime penale në hetim në Shqipëri dhe jashtë, për të njëjtët persona) dhe duke rrezikuar kështu fshirjen e kanalit “Arkiva Shqip”, prej të cilit dëmtohen vlerat që artistë, kolegë e miq, kanë ndërtuar në vite. Them shkelje edhe pse në shumë prej rasteve fjala më e saktë do të ishte vjedhje, sepse nuk mund të quhet ndryshe shfrytëzimi i punës së tjetrit pa i dhënë atij atë çka i takon.

Kolegë e miq, me shumë prej jush kam folur privatisht, pasi jeni interesuar, më keni pyetur, më keni përkrahur dhe për këtë u jam shumë mirënjohës, por në këtë rast dua publikisht të tërheq vëmendjen tuaj maksimale: mbroni veprat tuaja, mbroni muzikën tuaj, mbroni punën dhe rezultatet që keni arritur në vite, dhe mos lejoni në asnjë mënyrë t’ju shfrytëzojnë pa ju dhënë atë që ju takon, mos lejoni t’ju vjedhin, kushdo qofshin ata, mos heshtni kur doni të flisni, pavarësisht shantazheve, kërcënimeve, presioneve, sepse në fund të ditës e drejta nuk shtrembërohet dot.

Që në fillim të kësaj çështje kam besuar dhe shpresuar në mirëkuptimin e të gjithë artistëve, kolegëve, dhe miqve të mi, duke theksuar në çdo moment që kam kërkuar vetëm të drejtat e mia. Vendimi që u mor nga Gjykata e Këlnit është vetëm fillimi i një historie që do të jetë e lodhshme, por që në fund besoj se do të çojë në vend gabimet që të gjithë ne artistët, videoproduksionet, interpretuesit, tekstshkruesit, shtëpitë diskografike, televizionet, kemi bërë nga padituria, duke i besuar punën dhe djersën tonë, personave të gabuar. Ju them me bindje, që pavarësisht lodhjes që kjo çështje mbase do të sjellë, në fund do të jetë në të mirën e të gjithëve, dhe në favor të atyre që jetojnë me muzikën dhe për muzikën”, perfundon Flori Mumajesi.

VENDIMI I PLOTË NË SHQIP DHE GJERMANISHT

Reagon me thumba, pala tjetër

Lidhur me vendimin e marrë në Këln, kompania “Acromax”, ka reaguar, duke i kujtuar Mumajesit procesin tjetër gjyqësor në Tiranë, ku sikurse kompania thotë, ai asnjëherë nuk është paraqitur.

“Se sa "te thella" jane metodat juridike te Florjan Mumajesit dhe sa qesharake janë veprimet ne lidhje me këto çështje ne praktike, tregon çështja me numer 6493 e dt. 02.12.2013 prane Gjykates te Shkalles se Pare ne Tirane – te cilen Florjan Mumajesi e ka hapur kundra kompanise Acromax. Po ju tregojme protokollin e gjykatës: 16.12.2013 12:30: -U thirr dhe nuk u paraqit paditesi Florian Mumajesi… 06.02.2014 12:30 : Seanca pergatitore filloi ne ora 12.51 (filloi me vonese per shkak te gjyqit te meparshem) Verifikohet prezenca e palëve: -U thirr dhe nuk u paraqit paditesi Florian Mumajesi… 05.03.2014 10:30: Seanca pergatitore filloi ne ora 10.30. -U thirr dhe nuk u paraqit paditesi Florian Mumajesi… 31.03.2014 12:30: Seanca përgatitore filloi ne ora 12.30. -U thirr dhe nuk u paraqit paditesi Florian Mumajesi… Seanca e radhës është me dt. 25.04.2014, ne oren 11.00”.

Duke publikuar të detajuar ecurinë e deritanishme të procesit, kompania thumbon: “Si mendoni, do të vijë Flori apo prapë nuk do vijë? Çfarë mendoni se mund ta stimulojë Florin që të paraqitet ne gjykate? Opinionin mund t’ia dërgoni edhe avokatit te tij Erajd Dobjani, në mënyrë direkte, pasi ai e përfaqëson Mumajesin ne çështjen e mësipërme”, – pohojnë nga kompania “Acromax”.

"ArkivaShqip" konsiderohet si platforma më e madhe shqiptare në YouTube. Ajo numëron mbi 1300 video dhe mbi 73 milionë shikime për 2 vjet dhe më shumë se 12 mijë abonentë. ArkivaShqip thotë se është e vetmja platformë legale që mbron të drejtat e të gjithë artistëve shqiptarë, të drejtat intelektuale të veprave të tyre nëpërmjet eksperiencës internacionale të kompanisë Acromax GmbH në Gjermani. /a.b/noa.al/