Gjirokastër, 13 shkurt 2014, NOA.al-  Specialistët e Sektorit Kundër Krimit Ekonomiko – Financiar në Drejtorinë e Policisë së Qarkut Gjirokastër, pas një pune hetimore disa javore dhe mbi bazën e informacioneve të grumbulluara se disa shtetas nga Tepelena dhe nga Fieri po ushtronin veprimtari kriminale në fushën e falsifikimit të monedhave, dje kanë zhvilluar operacionin e koduar “Falsifikatorët”.

Si rezultat i operacionit u bë e mundur arrestimi në flagrancë i shtetasve, Shpëtim Hilaj, i datëlindjes 1974, banues në Fier, Riza Tafili , i datëlindjes 1986, banues në Tepelenë, Kleant Qeriza, i datëlindjes 1991, banues në Tepelenë dhe Aldo Pata, i datëlindjes 1993, banues në Tepelenë, i dënuar më parë për vjedhje.

Sipas policisë, këta shtetas në bashkëpunim me njëri-tjetrin ushtronin veprimtari kriminale në fushën e falsifikimit të monedhave, duke falsifikuar Euro prerje 20-çe dhe më pas i hidhnin në qarkullim në qytete të ndryshme .

Në hyrje të qytetit Gjirokastër këta shtetas janë kapur në flagrancë nga ana e Specialistëve të  Sektorit Kundër Krimit Ekonomiko Financiar, dhe gjatë kontrollit të ushtuar në automjetin e tyre poshtë sediljes së shoferit u gjetën 1.680 Euro prerje 20-çe, me një numër serie.

Si dhe 20 euro po me të njëjtin numër serie iu gjetën në xhep shtetasit Shpëtim Hilaj.

Sasia e Eurove dhe automjeti u sekuestruan në cilësinë e provës materiale. Në bashkëpunim me Prokurorinë e Rrethit Gjyqësor Gjirokastër po vijon puna për zbardhjen e plotë të rrjetit të falsifikimit të Eurove. /e.gj/noa.al/