Fitorja 3-1 ndaj Interit ishte një provë force e treguar nga Juventus, që la të kënaqur sidomos trajnerin Antonio Conte, citon Supersport. 44-vjeçari, tha se e kishte përgatitur deri në detaje supersfidën e javës së 22 të Serisë A, ndërsa shpjegoi reagimin e tij impulsiv edhe kur rezultati ishte 3-0.

“E kishim përgatitur sfidën në detajet më të vogla, në të gjithë pikëpamjet. Veçanërisht kishim studiuar mënyrën sesi duhej liruar Pirlo nga mbulimi i Kovaçiç dhe Alvarez.

Goli i pësuar mund të rihapte ndeshjen. Kur rezultati ishte 3-0 bëra si i çmendur sepse tensioni duhet ruajtur deri në fund, mjafton një gol aksidental për të ndryshuar rrjedhën e lojës.” Ndodh rrallë që Conte të flasë me superlativa për formacionin e tij, sepse një trajner si ai nuk kënaqet kurrë.

“Jemi skuadra që ka shënuar më shumë gola, dhe mund realizonim më shumë edhe ndaj zikaltërve, por Handanoviç u tregua shumë i zoti në situata të veçanta. Gjithsesi, jam i kënaqur nga paraqitja e përgjithshme.”

Conte rezervon një koment edhe për merkaton e sapombyllur. “Osvaldo ishte një mundësi që e shfrytëzuam. Ai kërkoi me ngulm të vinte tek ne, madje ka pranuar edhe ulje të pagës. Me të kemi rritur cilësinë e sulmit”.

Ndërsa një vlerësim të veçante trajneri bardhezi ka për Pogba dhe Vidal. “Shpresoj të vijojnë kështu dhe të përmirësohen më tepër. Shpresoj gjithashtu që djemtë e mi të fitojnë sa unë ose më shumë”.

I kenaqur me fitoren dhe sigurisht me golin e shënuar, Arturo Vidal tha se Juventusi tregoi edhe një herë se është skuadra më e fortë, e cila duhet të vijojë me këtë ritëm deri në fund të sezonit.

Kiliani ia dedikoi golin familjes, veçanërisht vajzës së tij, që pritet të vijë së shpejti në jetë.