Tiranë, 15 shtator 2013, NOA-Qeveria e mazhorancës së majtë pritet të marrë detyrën pasditen e sotme. Megjithëse në Kuvend vazhdojnë ende fjalimet e deputetëve, drejtuesit e grupeve parlamentare kanë llogaritur që të gjithë fjalimet të përfundojnë rreth orës 16:00. Rreth orës 17:00, 21 anëtarët e kabinetit qeveritar do të bëjnë betimin në Presidencë, duke marrë në këtë mënyrë zyrtarisht detyrën. Më pas kabineti i qeverisë do të shkoj në ambientet e Kryeministrisë për të bërë dhe mbledhjen e parë zyrtare. Rreth orës 18:00 pritet edhe një deklaratë përshëndetëse e kryeministrit Edi Rama.

Nga Partia Socialiste mësohet se ministrat e rinj dhe kryeministri Edi Rama do të udhëtojnë në këmbë nga Presidenca për në godinën e kryeministrisë në Bulevardin “Dëshmorët e Kombit”.

Prej dy ditësh në Kuvend po diskutohet programi i qeverisë. Seanca e ditës së parë nisi të shtunën në orën 10:00 dhe përfundoi të dielën në orën 01:00. Pas 8 orë pushimi, deputetët janë mbledhur sot sërish në seancë në orën 09:30. Në total, janë rreth 100 fjalime që janë mbajtur nga deputetët e Partisë Socialiste dhe Partisë Demokratike.

QEVERIA E RE

1. Edi Rama, Kryeministër

2. Niko Peleshi, zëvendëskryeministër

3. Ditmir Bushati, ministër i Punëve të Jashtme

4. Mimi Kodheli, ministre e Mbrojtjes

5. Saimir Tahiri, ministër i Punëve të Brendshme

6. Klajda Gjosha, ministre e Integrimit Evropian

7. Shkëlqim Cani, ministër i Financave

8. Edmond Haxhinasto, ministër i Transportit dhe Infrastrukturës

9. Eglantina Gjermeni, ministre e Zhvillimit Urban dhe Turizmit

10. Arben Ahmetaj, ministër i Zhvillimit Ekonomik, Tregëtisë dhe Sipërmarrjes

11. Lindita Nikolli, ministre e Arsimit dhe Sportit

12. Nasip Naço, ministër i Drejtësisë

13. Mirela Kumbaro Furxhi, ministre e Kulturës

14. Erion Veliaj, ministër i Mirëqenies Sociale dhe Rinisë

15. Damian Gjiknuri, ministër i Energjisë dhe Industrisë

16. Edmond Panariti, ministër i Bujqësisë, Zhvillimit Rural dhe Administrimit të Ujërave

17. Ilir Beqja, ministër i Shëndetësisë

18. Lefter Koka, ministër i Mjedisit

19. Milena Harito, ministre Shteti për Inovacionin dhe Administratën Publike

20. Bledi Çuçi, ministër Shteti për Çështjet Vendore

21. Ilirjan Celibashi, ministër Shteti për Marrëdhëniet me Parlamentin