Berat, 13 maj 2013, NOA.al- Kryetari i Partisë Socialiste Edi Rama u ndal në qytetin e Beratit për të prezantuar kandidatët për deputetë.

Në fjalën e tij ai shprehu mirënjohje për deputetin e këtij qarku Erion Braçe, i cili për zgjedhjet e 23 qershorit kandidon në Fier.

Një tjetër falënderim ai shprehu për deputetin e këtij qarku Marko Bello, i cili nuk është pjesë e listave të kandidatëve për deputetë.

Rama shprehu bindjen se në këtë qark Partia Socialiste do të marrë 6 deputetë, si alternativa më e mirë e qeverisjes.

“Më 23 qershor do të realizojmë triumf. Çfarë u shkon ndërmend beratasve kur vijnë nga rruga e hyrjes për në qytet. Kush e katandisi këtë rrugë si skutë e jo si rrugën e njërës prej pjesëve më të çmuara të thesarit historik. Si ka mundësi të votohet për këtë parti, të katandisur në pushtetin e një familje dhe një klani përfituesish të pashpirt, qorrash dhe shurdha. U them të gjithë beratasve se vota e 23 qershorit nuk vendos se kush do të qeverisë në katër vitet e ardhshme, por vendos fatin e një gjenerate të tërë. Kush voton me verbëri le të shkojë të votojë Saliun, por kush i thotë vetes njeri, qytetar, e shqiptarë të votojë Partinë Socialiste, Aleancën për Shqipërinë Europiane, të votojë që të ndalet rrënimi dhe të rilindë vendi”, tha gjatë fjalës së tij kryesocialisti.

Referuar elektoratit demokrat, ai i ftoi që të mos i japin votës PD, në mënyrë që ti jepet mundësia të rilindë. Ndër të tjera ai i cilësoi zgjedhjet e 23 qershorit si të një rëndësie njëlloj si ato të vitit 1992.

Kandidatët e PS për qarkun Berat:

1. Fidel Ylli

2. Ermonela Felaj

3. Eduard Shalsi

4. Eduart Bejko

5. Artan Lame

6. Stavri Ceca

7. Erjon Kërri

8. Anila Agalliu

9. Alma Kule.a.y/noa.al