Tiranë, 3 dhjetor 2012, NOA- Gjyqtari i Durrësit Neritan Tabaku është vënë zyrtarisht në hetim.

Pasi refuzoi paraqitjen rreth dy javë më parë në Prokurori dhe dy mungesave në mbledhjet e Këshillit të Lartë të Drejtësisë, gjyqtari Tabaku është vënë nën hetim.

Prokurori i çështjes Juljan Zonja deklaroi se gjyqtari u paraqit në organin e akuzës ditën e sotme, ndërsa u vu zyrtarisht nën hetim duke iu komunikuar akuza për “shpërdorim detyre me pasoja të rënda”.

Këshilli i Lartë i Drejtësisë siç raporton noa.al pak kohë më parë pezulloi gjyqtarin e Tabaku, “për shpërdorim detyre” pasi jo vetëm nuk zbardhi vendimin për lirimin e të akuzuarit për vrasje Ilir Xhakja, por nuk depozitoi në kryesekretari fashikullin e gjykimit, duke penguar kështu zhvillimin e procesit në Gjykatën e Apelit Durrës.

Gjyqtari Tabaku dyshohet se ka vonuar qëllimisht zbardhjen e vendimit që liroi Ilir Xhakjan, vrasësin e shefit të komisariatit të Shijakut.

Kujtojmë këtu se Ilir Xhakja ekzekutoi në Sukth të Durrësit, kryepolicin e Shijakut Adem Tahiraj, ndërsa më herët ka qenë i dënuar për vrasje, por se ishte liruar nga Gjykata e Durrësit dhe se vendimi i dhënë prej saj nuk ishte zbardhur nga gjyqtari Tabaku.

Në mbledhjen e së premtes së shkuar të Këshillit të Lartë të Drejtësisë ku një pikë kyçe e rendit të ditës ishte marrja e masës disiplinore për gjyqtarin Neritan Tabaku, ky i fundit dërgoi raport mjekësor për të justifikuar praninë e tij në mbledhje, ndërsa këtë të premte është lajmëruar mbledhja e KLD enkas për masën ndaj këtij gjyqtari.

a.y/noa.al

Mos humbisni edhe: KLD mblidhet për masën ndaj gjyqtarit, Tabaku dërgon raport

Liroi Ilir Xhakja-n, gjyqtari refuzon paraqitjen në Prokurori

Liroi Ilir Xhakjan, KLD: Mbledhje e posaçme për gjyqtarin Tabaku

Procedim penal për gjyqtarin Neritan Tabaku, liroi Ilir Xhakjan

Vrasja e Tahiraj, KLD: Hetim dosjes që liroi nga burgu Ilir Xhakja-n