Tiranë, 3 maj 2012, NOA – Zyrtarizmi i gjuhës së shenjave në Shqipëri, si pjesë e plotësimit dhe respektimit të të drejtave të personave që nuk dëgjojnë, ishte kryefjala e një tryeze të përbashkët të organizuar në Tiranë, raporton agjencia e lajmeve NOA.al.

Kjo tryezë e organizuar nga Ministria e Punës, Çështjeve Sociale dhe Shanseve të Barabarta, Shoqata Kombëtare të Personave që nuk Dëgjojnë (ANAD) me mbështetjen e Projektit të PNUD, mblodhi edhe përfaqësues të OJF-ve.

Zv/ministrja Filloreta Kodra gjatë fjalës së saj theksoi se “mungesa e standardizimit të gjuhës së shenjave jo vetëm ka krijuar një distancë të pajustifikuar deri tani, por ka vështirësuar në të njëjtën kohë arsimin, punësimin, marrjen e kujdesit shëndetësor dhe gjithë shërbimeve të tjera të domosdoshme për personat që nuk dëgjojnë e nuk flasin”.

Sipas Kodrës, zyrtarizimi i gjuhës shqipe të shenjave është një hap

i rëndësishëm, i cili do të vendosë në kushte të barabarta komunikimi personat me

vështirësi në dëgjim me pjesën tjetër të shoqërisë.

“Shërbimi i interpretit të gjuhës së shenjave duhet futur menjëherë si në institucionet

edhe administratën shtetërore ku ofrohen shërbime, edhe në të gjitha mjediset e tjera

me rëndësi publike si një detyrim ligjor, që t’u sigurojë të drejtat që meritojnë këtij

komuniteti”, vuri në dukje zëvendësministrja Kodra.

Drejtori i Zyrës për Qeverisje të Mirë në Kabinetin e kryeministrit të

Kosovës, Habit Hajredini, solli eksperiencën pozitive të Kosovës, e cila ka zyrtarizuar

gjuhën e shenjave, duke e vënë theksin në rëndësinë e këtij procesi.

Kryetari i Shoqatës Kombëtare të Njerëzve që nuk dëgjojnë në Shqipëri, Eduard Ajazi,

falenderoi Ministrinë e Punës për inisiativën e marrë dhe u ndal në rëndësinë që ka për

personat që nuk dëgjojnë, zyrtarizimi i gjuhës së shenjave edhe në Shqipëri.

Gjatë takimit u diskutua mbi nisjen e procesit për Zyrtarizimin e Gjuhës së Shenjave në vendin tonë.

Ky aktivitet u zhvillua në kuadër të aktiviteteve që shoqërojnë procesin drejt ratifikimit

të Konventës së OKB-së për Personat me aftësi të kufizuara, nga Parlamenti shqiptar.

mit/noa.al