Tiranë, 7 shtator, NOA – Pacientët e shtruar në pavijonet e Qendrës Spitalore Universitare “Nënë Tereza” përveç ndihmës mjekësore do të kenë mundësinë të marrin edhe ndihmë psikologjike nga punonjësit socialë në rastet kur ata paraqesin probleme sociale.

Kjo u vendos sot pas marrëveshjes së firmosur mes drejtorit të QSUT-së, Ilir Dashi dhe shefes së shërbimit Psiko-social të spitalit të “Santa Maria Degli Angeli” në Pordonone, të Italisë.

Drejtori i QSUT-së, Ilir Dashi u shpreh se “Ne duam të forcojmë këtë shërbim, që vite më parë është lënë pas dore, dhe vëmendja ka kaluar vetëm tek kurimi i pacientëve. Por, nga tani në QSUT do t’i kushtohet rëndësi edhe më e madhe punës së psikologut.

Drejtori i QSUT-së, kërkoi bashkëpunim në këtë fushë, porsa i përket eksperiencave dhe modeleve të trajtimit të pacientëve.

Përfaqësuesja italiane, Patrizia Portolan është treguar e gatshme për ofrimin e instrumenteve, programeve të punës, si dhe skedave, të cilat do të vendosen në të gjithë spitalin.

Tashmë ka nisur puna për trajnimin disaditor të psikologëve dhe punonjësve socialë të QSUT-së nga shefja e shërbimit psiko-social, në spitalin italian.

Pas përfundimit të këtij trajnimi pjesëmarrësit do të çertifikohen në mënyrë që të kenë mundësi të ndjekin të tjera kurse trajnimi edhe në shtetin fqinj, Itali.

mit/NOA