IRAN- Ministri i Jashtëm i Iranit tha mbrëmjen e djeshme se Teherani po hetonte sulmin e fundit në Iran, duke minimizuar goditjen dhe shtuar se asnjë lidhje me Izraelin nuk ishte provuar deri më tani. Në një intervistë të dhënë për rrjetin amerikan NBC, ministri i Jashtëm iranian Hossein Amir Abdollahian tha se dronët u ngritën nga brenda Iranit dhe fluturuan për disa qindra metra para se të rrëzoheshin.

“Ato dukeshin më shumë si lodra me të cilat luajnë fëmijët tanë, jo me drone. Nuk na është vërtetuar se ka një lidhje mes tyre dhe Izraelit”, tha Abdollahian, duke shtuar se Irani po hetonte çështjen por se raportet e mediave nuk ishin të sakta, sipas inteligjencës së Teheranit.

Mediat dhe zyrtarët iranianë përshkruan një numër të vogël shpërthimesh, për të cilat ata thanë se u shkaktuan kur sistemet e mbrojtjes kundërajrore rrëzuan tre drone mbi Isfahan në Iranin qendror në orët e para të së premtes. Ata iu referuan incidentit si një sulm nga "të infiltruarit brenda Iranit", në vend të Izraelit.

Abdollahian paralajmëroi se nëse Izraeli hakmerret dhe vepron kundër interesave të Iranit, përgjigja e radhës e Teheranit do të jetë e menjëhershme dhe në nivelin maksimal. "Por nëse jo, atëherë kemi mbaruar," tha ai.

Sulmi dukej se synonte një bazë të forcave ajrore iraniane pranë qytetit qendror të Isfahanit, pa goditur pika strategjike ose pa shkaktuar dëme serioze. Izraeli nuk ka bërë ende asnjë koment publik për incidentin.

Izraeli kishte thënë se do të hakmerrej kundër sulmit të 13 prillit, sulmi i parë i drejtpërdrejtë i Iranit ndaj Izraelit që nuk shkaktoi viktima, pasi Izraeli dhe aleatët e tij rrëzuan qindra raketa dhe drone. Teherani i nisi këto sulme në përgjigje të një sulmi ajror të kryer nga Izraeli më 1 prill, i cili goditi konsullatën iraniane në Damask dhe vrau disa zyrtarë iranianë.

Dhuna midis Izraelit dhe përfaqësuesve të Iranit në të gjithë Lindjen e Mesme është intensifikuar në gjashtë muajt e gjakderdhjes në Gaza, duke rritur frikën se lufta në hije midis dy vendeve mund të përshkallëzohet në konflikt të drejtpërdrejtë.