OJ Simpson, ish-ylli i futbollit amerikan që ishte në qendër të një gjyqi për vrasje të dyfishtë, gjyq që pushtoi botën tre dekada më parë, ka vdekur në moshën 76-vjeçare.

Simpson u shpall i pafajshëm në një gjyq të bujshëm të vitit 1995 për vrasjen e ish-gruas së tij, por u gjet përgjegjës për vdekjen e saj në një padi civile dhe më vonë u burgos për grabitje me armë dhe rrëmbim.

Ish-lojtari i NFL, i nxjerrë i pafajshëm nga një juri e Los Anxhelosit në atë që media amerikane e quajti "gjyqi i shekullit", vdiq të mërkurën (me orën lokale) pas një beteje me kancerin, postoi familja e tij në mediat sociale të enjten, raporton noa.al.

Simpson iu shmang burgut kur u shpall i pafajshëm për vrasjen me thikë në vitin 1994 të ish-bashkëshortes Nicole Brown Simpson dhe mikut të saj Ronald Goldman në Los Anxhelos.

Më vonë ai vuajti nëntë vjet në një burg në Nevada pasi u dënua në vitin 2008 për 12 akuza për grabitje të armatosur dhe rrëmbim të dy tregtarëve të artikujve sportivë nën kërcënimin e armëve në një hotel në Las Vegas.

Në maj të vitit të kaluar, Simpson tha në një video në X, se "vitet e fundit, vitet vërtet të fundit, për fat të keq u kapa nga kanceri, dhe kështu m’u desh të bëja të gjithë kimioterapinë".

Më vonë në video ai tha: "Tani jam i shëndetshëm; duket sikur e kam mundur".

Ylli që u bë i dyshuar

Simpson ishte një nga atletët më të mirë dhe më të njohur të fundit të viteve 1960 dhe 1970.

Ai e kapërceu dobësinë e fëmijërisë për t’u bërë një vrapues elektrizues në Universitetin e Kalifornisë Jugore dhe fitoi trofeun Heisman si lojtari më i mirë i futbollit në kolegj.

Pas një karriere rekord në NFL me Buffalo Bills dhe San Francisco 49ers, u fut në Sallonin e Famës së Pro Football.

Simpson kaloi më pas nga yll i futbollit në një karrierë si komentator sporti, yll reklamash televizive dhe aktor hollivudian në filma duke përfshirë serialin "Naked Gun".

Gjithçka ndryshoi pasi zonja Simpson dhe z. Goldman u gjetën të therur për vdekje në një skenë të përgjakshme jashtë shtëpisë së saj në Los Anxhelos më 12 qershor 1994.

Simpson u evidentua shpejt nga policia si i dyshuar.

Një nga gjyqet më famëkeqe të shekullit të 20-të

Ai u urdhërua të dorëzohej në polici, por pesë ditë pas vrasjeve, u arratis me fuoristradën e tij të bardhë me një ish-shok skuadre, duke mbajtur pasaportën e tij dhe duke u maskuar.

Një ndjekje policore në zonën e Los Anxhelosit përfundoi në rezidencën e Simpson dhe ai u kap dhe u akuzua më vonë për vrasjet.

Ajo që pasoi ishte një nga gjyqet më famëkeqe në Amerikën e shekullit të 20-të dhe një cirk mediatik.

Kishte gjithçka: një të pandehur të famshëm të pasur; një zezak i akuzuar për vrasjen e ish-gruas së tij të bardhë nga xhelozia; një grua e vrarë pasi u divorcua nga një burrë që e kishte rrahur; një "ekip ëndrrash" avokatësh mbrojtës të shtrenjtë dhe karizmatikë; dhe një gafë e madhe nga prokurorët. Dhe kur flasim për gafën, bëhet fjalë për një palë doreza, prova krimi, që prokuroria i kërkoi ti vishte nëse i bënin dhe dështoi me turp.

Simpson, i cili në fillim të çështjes e deklaroi veten "absolutisht 100 për qind të pafajshëm", përshëndeti anëtarët e jurisë dhe tha fjalët "faleminderit" pasi paneli kryesisht me ngjyrë prej 10 grave dhe dy burrave e shpalli të pafajshëm më 3 tetor 1995.

Prokurorët argumentuan se Simpson vrau ish-gruan e tij në një tërbim xhelozie dhe ata paraqitën teste të gjera të gjakut, flokëve dhe fibrave që lidhnin Simpson me vrasjet.

Mbrojtja kundërshtoi dhe tha se i pandehuri i famshëm u kryqëzua nga policia e bardhë raciste.

Gjyqi e tronditi Amerikën. Në Shtëpinë e Bardhë, presidenti i atëhershëm Bill Clinton u largua nga Zyra Ovale dhe pa vendimin në televizorin e sekretarit të tij.

Ekipi ligjor i Simpson përfshinte avokatë të shquar të mbrojtjes penale Johnnie Cochran, Alan Dershowitz dhe F Lee Bailey, të cilët shpesh manovronin prokurorinë.

Prokurorët kryen një gabim të paharrueshëm kur e urdhëruan Simpson të provonte një palë doreza të lyera me gjak të gjetura në skenën e vrasjes, të sigurt se ato do të përshtateshin në mënyrë të përsosur dhe do të tregonin se ai ishte vrasësi. Por dorezat nuk i vinin të dyshuarit që bërtiti plot triumf në sallën e gjyqit.

Familjet Goldman dhe Brown ndoqën më pas një padi për vdekje të gabuar kundër Simpson në gjykatën civile. Në vitin 1997, një juri kryesisht e bardhë në Santa Monica, Kaliforni, e gjeti Simpsonin përgjegjës për dy vdekjet dhe e urdhëroi atë të paguante 33.5 milionë dollarë si dëmshpërblim.

"Më në fund kemi drejtësi për Ron dhe Nicole," tha Fred Goldman, babai i Ron Goldman, pas vendimit.

Pas çështjes civile, disa nga gjërat e Simpsonit, duke përfshirë kujtimet nga ditët e tij të futbollit, u morën dhe u nxorën në ankand për të ndihmuar në pagesën e majme.

Më 3 tetor 2008, saktësisht 13 vjet pas lirimit të tij në gjyqin e vrasjes, ai u dënua nga një juri në Las Vegas me akuza përfshirë rrëmbim dhe grabitje të armatosur. Këto erdhën nga një incident i vitit 2007 në një hotel kazino, ku Simpson dhe pesë burra, të paktën dy me armë, vodhën relike sportive me vlerë mijëra dollarë nga dy tregtarë.

Simpson tha se ai thjesht po përpiqej të rimerrte reliket e tij, por u dënua me deri në 33 vjet burg.

"Unë nuk doja të lëndoja askënd," tha Simpson, duke veshur një bluzë burgu me pranga në këmbë dhe kyçe, gjatë dënimit të tij. “Nuk e dija se po bëja ndonjë gjë të gabuar”.

Simpson u lirua me kusht në 2017 dhe u zhvendos në një komunitet të mbyllur në Las Vegas. Ai u lirua para kohe edhe nga lirimi me kusht në vitin 2021 për shkak të sjelljes së mirë dhe ishte në moshën 74-vjeçare.

Saga e tij e jetës u rrëfye në dokumentarin fitues të Oskarit të vitit 2016 "OJ: Made in America" ​​si dhe dramatizime të ndryshme televizive. /noa.al