Operacioni policor i koduar “Repeat" ka vënë sot në pranga dy të rinj nga Elbasani, të cilët akuzohen se duke u prezantuar si përfaqësues të një personi publik, përfituan shuma parash nga një biznesmen.

Alban Gjoni dhe Rudor Balla janë arrestuar nga Sektori për Hetimin e Krimeve Ekonomike dhe Financiare, në DVP Tiranë, noa.al.

Ata akuzohen se tentuan të përfitonin një shumë të madhe parash, nga një shtetas (biznesmen), nëpërmjet mashtrimit duke u pezantuar si përfaqësues të një personi publik.

Sakaq po vijon puna për kapjen e bashkëpunëtorit të tyre ndërkohë që janë sekuestruar 8250 euro, 25 000 lekë, 1 automjet dhe 1 aparat celular.

Operacioni

Specialistët e Sektorit për Hetimin e Krimeve Ekonomike dhe Financiare, në vijim të punës për goditjen e veprimtarive kriminale në fushën e krimeve ekonomike, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe finalizuar operacionin policor të koduar “Repeat”, për identifikimin, kapjen dhe vënien në pranga të disa shtetasve të cilët në bashkëpunim me njëri-tjetrin, kishin tentuar të mashtronin një shtetas, për të përfituar prej tij, një shumë të madhe parash.

Si rezultat i këtij operacioni u bë arrestimi i shtetasve Alban Gjoni, 19 vjeç dhe Rudor Balla, 25 vjeç, të dy banues në Elbasan.

Gjithashtu u shpall në kërkim shtetasi F. L., 25 vjeç.

Këta persona kanë tentuar të mashtrojnë një shtetas (biznesmen), duke iu prezantuar atij si përfaqësues të një personi publik, për të përfituar shumën 50 000 euro.

Në cilësinë e provës materiale u sekuestruan 8250 euro, 25 000 lekë, 1 automjet dhe 1 aparat celular.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme. /noa.al