Thashethemet për një largim të mundshëm të Cristiano Ronaldos nga Manchester United duket se janë të vërteta. Gazeta "The Times" raporton se futbollisti i ka kërkuar klubit ndryshimin e skenës në merkaton e kësaj vere.
Pas një sezoni zhgënjyes, Cristiano Ronaldo, në moshën 37-vjeçare, e ka të qartë se do të jetë e vështirë të ngrejë tituj në "Old Trafford" dhe veçanërisht Champions League, obsesioni i tij i madh, duke qenë se klubi nuk merr pjesë në kompeticionin më të lartë europian për klube.
Nëse nuk do të merrte pjesë sezonin e ardhshëm, ai do t’i jepte fund serisë së tij prej 19 vitesh radhazi në Champions League, që nga largimi nga Sportingu i Lisbonës si adoleshent. Janë 183 prezenca të tij në kompeticionin në fjalë, të ndara me 140 gola dhe 42 asiste, përveçse e ka ngritur trofeun në 5 raste.
Kjo është arsyeja e madhe që CR7 duhej të kërkonte që, në rast se do të vinte një ofertë e kënaqshme, Manchester United ta pranonte atë në mënyrë që të përpiqej të zgjeronte legjendën e tij, tani që i ka mbetur gjithnjë e më pak kohë në elitë. Kujtojmë se "Djajtë e Kuq" do të luajnë në "Europa League".
Ndër të gjitha klubet që mund të jenë të interesuar për CR7, ato që bien në sy janë Bayern Munich dhe Chelsea, të cilët tashmë kanë shfaqur interes për inkorporimin e sulmuesit. Në fakt, nga Anglia raportojnë se Todd Boehly, pronari i ri i bluve të Londrës, është takuar me Jorge Mendes një muaj më parë me shpresën për të siguruar një marrëveshje për sulmuesin.
Megjithatë, Cristiano vazhdon të ketë kontratë me Manchester United edhe për një sezon, deri në qershor 2023, me opsionin e një edicioni më shumë, ndaj do t’i duhet të paguajë për largimin. Vetëm një vit më parë, Manchester United pagoi 15 milionë euro për të, shumë të cilën "Djajtë e Kuq" shpresojnë t’ua rikthejë.
Pa dyshim, lajmi i zbuluar nga "The Times" është i bujshëm, sepse pak më pak se një vit më parë Cristiano Ronaldo u kthye me stil në atë që kishte qenë shtëpia e tij, për ta ndihmuar Manchester United të bënte një hap tjetër përpara, por kjo nuk u arrit.