Shkon në gjashtë numri i kandidatëve në garë për pozicionin e Prokurorit të Përgjithshëm të Përkohshëm.
Pak para mbylljes së afatit zyrtar për dorëzimin e aplikimeve, Ermira Tafani ka dorëzuar dokumentacionin e saj duke u bërë kandidatja e gjashtë në garë.
Tafani është aktualisht prokurore në rrethin e Elbasanit.
Më herët ishte prokurori i Tiranës Granit Shehu, ai që dorëzoi aplikimin për pozicionin e kryeprokurorit.
Por pak minuta para tij ishte Besnik Muçi emri i katërt i cili ka aplikuar.
Muçi mban aktualisht postin e prokurorit në Prokurorinë e Krimeve të Rënda.
Më herët mesditën e sotme, ka dorëzuar në Kuvend kandidaturën e tij, Arqile Koça. Ai rezulton prej vitesh punon si prokuror në Prokurorinë e Përgjithshme.
I pari që shpalli kandidaturën ishte Ferdinand Elezi, i cili është drejtues i Prokurorisë së Apelit Durrës.
Ndërkohë ditën e djeshme zyrtarizoi kandidaturën e saj, edhe Arta Marku, cila aktualisht është prokurore në rrethin e Shkodrës.
Kryetari i Komisionit të Ligjeve, Ulsi Manja ka bërë me dije se aplikimet vazhdojnë deri pasditen e sotme në orën 18:00.
Pas dorëzimit të kandidaturave, dhe mbylljes se afatit, faza pasuese është seanca dëgjimore me ta në Kuvend, dhe me tej votimi i thjeshtë në Parlament. /a.y/noa.al