Transmetuar më 16-07-2017, 12:43

Kandidati në garë përballë Lulzim Bashës, për postin e kryetarit të Partisë Demokratike, Eduard Selami, në vijim të turit elektoral u ndal me demokratët e Elbasanit, Librazhdit, Belshit, Përrenjasit dhe Gramshit.

Ai i kërkoi që listat e votuesve të jenë të hapura për të gjithë në mënyrë që zgjedhjet e 22 korrikut të jenë transparente.

“Hajde ta bëjmë sa më të mirë garën, që listat tona duhet të jenë transparente. Listat e votuesve të PD duhet të bëhen publike. Nuk janë bërë. Ne duhet t'i lëmë qytetarët, votuesit tanë dhe ata që s'ja​në anëtarë partie ta shikojnë se çfarë po ndodh këtu. Nuk jemi ne parti ilegale. Demokratët janë krenarë që janë pjesë e PD”, u shpreh Selami.

Ai gjithashtu i kërkoi kandidatit tjetër për kryetar, Lulzim Bashës, që të pranonte debatin e hapur për mediat dhe qytetarët ashtu siç kishte premtuar në fillim të garës.

“Të shpalosim platformën tonë dhe ti bëjmë pyetje njëri-tjetrit edhe me mediat këtu, dhe gjithkush të marrë atë që i takon, ballë për ballë. Basha i’u largua debatit. Unë mendoj që kjo nuk është e drejtë dhe i bëj thirrje se akoma ka kohë. Hajde, prej këtej e tutje t'i bëjmë debatet të hapura përpara kamerave, ta shikojmë se ku kemi gabuar. T'ia them në sy se ku e humbi besimin tim”, tha Selami.

Ai deklaroi më tej, se problemi i Bashës, është se mendon më shumë të ruajë karrigen e tij si kryetar se sa për rimëkëmbjen e demokratëve.

“Kush është qëllimi dhe interesi kryesor i z.Basha? Rimëkëmbja e Partisë Demokratike apo mbajtja dhe ruajtja e postit të kryetarit? Kam frikë se është një pyetje që në mënyrë të sinqertë z.Basha nuk i përgjigjet dot”, u shpreh Selami.

Ai i siguroi demokratët se merr pjesë në këtë garë për t'i ngjallur shpresën dhe për t'u rikthyer më të fuqishëm se asnjëherë më parë.

“Jam këtu për t'ju ngjallur edhe njëherë shpresën dhe besimin që së bashku do të rikthehemi fuqishëm, edhe më fuqishëm se sa në kohët tona më të mira. Të gjithë jemi krenarë që në historinë tonë kurrkush nuk ka bërë më shumë se ne. Rrëzuam diktaturën më të egër së bashku me qytetarët shqiptarë dhe e futëm Shqipërinë në rrugën e Europës, në rrugën e shtetit ligjor, në rrugën e lirisë së institucionalizuar dhe në rrugën e demokracisë. Këto janë fakte”, tha Selami.