Transmetuar më 15-03-2017, 16:17
Publicitet

Ministrja për Dialog me Serbinë, Edita Tahiri, mori pjesë në Konferencën e Fondacionit Evropian të Edukimit në Shtutgart të Gjermanisë, ku u bë anëtarësimi i Kosovës në Programin Trans nacional të Danubit, i cili ka për synim lidhjen e edukimit me punësimin, e njohur gjithashtu si arsimi dual.

Në kuadër të takimit të komitetit drejtues, ministrja Tahiri tha se Kosova është e interesuar që të zhvillojë ekonominë dhe të rrisë vendet e punës, prandaj modelet e avancuara të arsimit që lidhin ekonominë, ndërmarrësin dhe partneritetin me sektorin privat përbëjnë një drejtim të rëndësishëm në transformimet e duhura arsimore në epokën e teknologjisë informative dhe dixhitalizimit.

Ajo theksoi se vetë shkollimi i saj në Universitetin e Harvardit, i ka dhënë mundësi që të njihet me rëndësinë e lidhjes së teorisë me praktikën, gjë e cila bënë që studentët me kohë të formësojnë mendimin e tyre politiko-ekonomik në interesat e vendit dhe shoqërisë së tyre. Në këtë kontekst, ajo nënvizoi rëndësinë që Kosova të jetë anëtare e Programit Trans nacional të Danubit nën udhëheqjen e Gjermanisë.

Ministrja Tahiri, falënderoi Wolfgang Schuster, kryesues i Fondacionit Evropian të Edukimit për mundësinë që Kosova të jetë pjesë e programit për zhvillimin e edukimit dual që financohet nga Komisioni Evropian dhe i cili Kosovës i hap mundësi të zhvillimit të arsimit, me theks në lidhjen e arsimit me punësimin.

Ministrja Tahiri, e ftoi Schuster për vizitë në Kosovë, për mundësitë e thellimit më të madh të bashkëpunimit.

Nënshkrimin e marrëveshjes “Përkushtimi ynë për zhvillimin e shanseve për të rinjtë”, në emër të Kosovës e bëri ministri i Arsimit, Arsim Bajrami, bashkë me përfaqësuesit e pesëmbëdhjetë shteteve të tjera evropiane që janë partnerë të këtij projekti.

Në këtë ceremoni mori pjesë edhe Ministri i Drejtësisë dhe Çështjeve Evropiane të Badenit, Guido Wolf, i cili mbajti një fjalim mbi të ardhmen evropiane të vendeve aspirante, i cili me këtë rast tha se BE duhet të rrisë angazhimet për t’i integruar këto vende, ndërsa tha se vetë këto shtete duhet të angazhohen në përmbushjen e standardeve për integrim në BE, në mënyrë që të realizohet qëllimi për një familje të madhe evropiane, ku të gjitha vendet janë pjesë e saj.

Loading...