Drejtori i Zyrës për Evropën Juglindore në Departamentin Amerikan të shtetit, Matthew Palmer, ka deklaruar se procesin e normalizimit të raporteve ndërmjet Beogradit e Prishtinës, Shtetet e Bashkuara e trajtojnë si proces të ndarë nga pranimi i pavarësisë së Kosovës.

“Mendoj se normalizimi është i definuar dhe i njohur në kuadër të dialogut të Brukselit dhe e trajtojmë si proces të ndarë nga pranimi i pavarësisë”, tha zoti Palmer në intervistën e botuar sot në të përditshmen beogradase, Politika, me titull “Amerika mbetet në Ballkan”.

I pyetur se a është e mundshme që Serbia të pranohet në Bashkimin Evropian, pa e pranuar pavarësinë e Kosovës, Matthew Palmer është përgjigjur se kjo është pyetje për Bashkimin Evropian, raporton agjencia Beta.

“Ajo që ne bëjmë është që në masë të plotë ta mbështesim procesin e normalizimit të raporteve ndërmjet Beogradit e Prishtinës”, tha Palmer, duke shtuar se “momentalisht nuk shikojmë përtej kësaj pike”.

Mëtutje, zyrtari amerikan tha se Shtetet e Bashkuara e mbështesin qëllimin e Serbisë që të bëhet pjesë e BE-së, duke theksuar se normalizimi i raporteve me Kosovën është pjesë e rëndësishme e këtij qëllimi.

“Është e nevojshme të arrihet përparim në dialogun e Brukselit, në mënyrë që të kemi progres në rrugën e eurointegrimeve”, tha Matthew Palmer.

Zoti Palmer ka theksuar se politika e Shteteve të Bashkuara ndaj Ballkanit dhe rajonit, është e njejtë në 20 apo 25 vitet e fundit dhe tha se nuk ka asnjë arsye të besoj se do të ketë ndonjë ndryshim në qasjen për këtë çështje.