Transmetuar më 21-01-2024, 22:51

Kryetari i Partisë Republikane në Serbi, Nikolla Sanduloviç i cili u dhunua brutalisht nga shërbimi sekret serb pasi mbajti homazhe në varret e familjes Jashari në Prekaz, ka dhënë një intervistë për mediat në Kosovë.

Sanduloviç mohoi se ka kryer veprën penale për të cilën pas dhunimit u arrestua, teksa paralajmëroi se do të kërkojë përgjegjësi ligjore për torturën që ka përjetuar. Sanduloviç akuzohet se “ka kryer veprën penale të nxitjes së urrejtjes dhe jo-tolerancës kombëtare, racore dhe fetare”. Kjo pasi në rrjetet sociale ka njoftuar se ka kërkuar falje për krimet ndaj shqiptarëve dhe ka treguar se ka vendosur lule në varrin e familjes së Jashari ne Prekaz.

Ndërsa teksa foli për mediat e Kosovës, tha se nuk ka asgjë të keqe nga veprimi i tij për të vendosur lule në varrin e vajzës 7-vjeçare të familjes Jashari dhe shtoi se e kishte bërë si një person që është për paqe dhe pajtim në rajon.

“Çfarë krimi është nëse i vendos lule mbi varrin një vajze të vrarë shtatëvjeçare, ku ka faj ajo, kushdo qoftë babai i saj, çfarë lidhje ka kjo me vajzën. E bëra si njeri, babai, bashkëshorti, si lider i një partie, politika e së cilës është paqja dhe pajtimi në rajon. E konsiderova si detyrim njerëzor dhe moral të shpreh respektin dhe keqardhjen për vrasjen e një vajze shqiptare në këtë rast, të gjithë fëmijët janë viktima të pafajshme”, thotë Sanduloviç.

Bashkohu me kanalin e NOA WhatsApp për lajmet më të fundit direkt në celularin tënd