Cilët trajnerë janë aktualisht në kërkim të një stoli? Ja disa emra, më kryesorët, pa ekip për sezonin 2023-2024. Mes tyre ka “big” si Antonio Conte dhe Zinedinë Zidane, por jo vetëm. Portali i njohur ndërkombëtar sportiv "Goal.com" ka evidentuar ata që kanë një CV mbresëlënëse dhe është mëkat që nuk i shohim në veprim. Pa ta, futbolli sigurisht që ka diçka mangët…

FABIO CANAVARO

Skuadra e fundit 2022-2023: Benevento

I lidhur vazhdimisht me Italinë, por edhe me ekipet e huaja, Cannavaro është i lirë pas përvojës së vështirë te Benevento. Ish-fituesi i “Topit të Artë” është në kërkim të një ekipi të ri për ta trajnuar.

ANTONIO CONTE

Skuadra e fundit 2022-2023: Tottenham

Pasi u largua nga “Spurs” në fillim të vitit 2023, Conte është trajner i lirë. Kjo ishte përvoja e tij e dytë angleze pas Chelsea. Prej vitesh është folur për një rikthim të mundshëm te Juventusi, pas fitoreve të njëpasnjëshme të titullit kampion me bardhezinjtë.

HANSI FLICK

Skuadra e fundit 2023-2024: Gjermania

Një idhull në Mynih, pasi fitoi gjithçka me Bayernin, Flick nuk pati të njëjtin ndikim në kombëtaren gjermane. Nga mesi i verës 2023 u shkarkua për t’i hapur rrugë Nagelsmann.

MARCELO GALLARDO

Skuadra e fundit 2021-2022: River Plate

Ndër trajnerët më të suksesshëm në Amerikën e Jugut, Gallardo dukej se mund të zbarkonte fillimisht te Napoli dhe më pas në Marseille, por për momentin nuk ka pasur “tym të bardhë” mbi të ardhmen e tij. Ai mbetet i lirë të nënshkruajë me një klub të ri.

CRISTOPHE GALTIER

Skuadra e fundit 2022-2023: PSG

Ashtu si shumë paraardhës, Galtier gjithashtu nuk arriti ta çonte PSG-në drejt fitores në Ligën e Kampionëve. Një trajner i shkëlqyer, në kërkim të shpagimit pas shkarkimit në Paris (pavarësisht se fitoi Ligue 1).

FRANK LAMPARD

Skuadra e fundit 2022-2023: Chelsea

Pasi bëri historinë e futbollit anglez si lojtar, Lampard nuk ka arritur ende të bëhet një trajner i klasit të parë. Ka idetë e tij, pret momentin e duhur për t’i vënë ato në jetë.

JULEN LOPETEGUI

Skuadra e fundit 2022-2023: Wolverhampton

Ndër trajnerët më të mirë spanjollë të gjeneratës së tij, Lopetegui u shkarkua nga klubi britanik pak para se të bënte debutimin e tij në Premier League. Është gati për t’u rikthyer në rrugën e duhur, në një kampionat të madh.

JOACHIM LOW

Skuadra e fundit 202002021: Gjermania

Ai që udhëhoqi Gjermaninë drejt fitores në Kupën e Botës 2014 është i mbërthyer pas viteve të tij si trajner i kombëtares gjermane. Low ka mbetur pa ekip që nga viti 2021, pasi ka qenë fytyra e kombëtares gjermane për 15 vite.

GRAHAM POTTER

Skuadra e fundit 2022-2023: Chelsea

Chelsea, sezonin e kaluar ishte zhgënjyes me çdo trajner në stol. Potter, i cili mbërriti nga Brighton në përpjekje për të ndryshuar situatën, u shkarkua në prill. Tani do të përpiqet ta dëshmojë me një klub tjetër se ai nuk ishte problemi kryesor.

OLE GUNNARS SOLSKJAER

Skuadra e fundit 2021-2022: Manchester United

I liruar nga “Djajtë e Kuq” në fund të vitit 2021, trajneri norvegjez nuk ka gjetur ende ekip të ri. Thashethemet për kampionatin anglez nuk u realizuan dhe prej gati dy vitesh është trajner i lirë.

FATIH TERIM

Skuadra e fundit 2021-2022: Galatasaray

“Perandori” është 69 vjeç, por nuk dëshiron të tërhiqet. Sapo të gjejë një projekt të ri interesant, do të përpiqet ta pasurojë “palmaresin” e tij në Turqi ose jashtë saj.

TITE

Skuadra e fundit 2022-2023: Brazili

Trajneri brazilian nuk është më pjesë e kombëtares së njohur të Amerikës së Jugut, e cila do t’i besohet Carlo Ancelottit duke filluar nga viti 2024.

ZINEDIN ZIDANE

Skuadra e fundit 2020-2021: Real Madrid

Pas fitimit të tre Champions League me Real Madridin, trajneri francez ka dy vite pa angazhim tjetër. U fol për Francën dhe Juventusin, si dhe për rikthimin te “Los Blanco”, por në fund asnjëra prej këtyre. Pra, deri tani nuk ka rikthim apo eksperiencë të re për “Zizou”.