“Nuk është dhuna ajo që zgjidh problemet tona”. Është kjo deklarata e bërë nga ministri i Brendshëm, Sandër Lleshaj teksa vizitoi efektivët e policisë që mbetën të plagosur gjatë përplasjet me banorët protestues të Unazës së Re para Parlamentit.

Ai u zotua se skena të tilla do të jenë më të pakta në rrugët e vendit.

Ndërkohë duke folur për mediat ministri tha se, “Është për të ardhur keq, është e papranueshme dhe e pakuptueshme që në një ditë të tillë të na ndodhin ngjarje anormale. Policia e Shtetit është në shërbim të qytetarëve për të garantuar rendin. Sot ajo është goditur nga qytetarë të papërgjegjshëm por edhe përfaqësues politik që inspirojnë dhunë ndaj efektivëve të policisë”.

Sipas tij, konflikti mes qytetarëve me autoritetet civile, nuk mund të shkarkohet në dhunë ndaj efektivëve të policisë, për të cilët tha se pësojnë një dhunë të pamerituar.

Ai tha se policia mban mbi supe rendin në vend dhe kush ngrë dorë ndaj saj ngre dorë ndaj rendit e ngre dhe simboleve kombëtare që ata mbajnë mbi supe.

Ministri iu bëri thirrje përfaqësuesve politikë që të distancohen nga dhuna dhe aktet e papërgjegjshme, pasi sipas tij policia është e shtetit shqiptar.

“Ju bëj thirrje qytetarëve që të kuptojnë mirë se qeveria shqiptare është e angazhuar që të plotësojë çdo detyrim ndaj kujtdo individi. Ndërsa gjithë ata që kanë guxuar të përballen me Policinë e Shtetit, maturia e policisë nuk duhet kuptuar për dobësi”, deklaroi ministri, duke thënë se nuk do të tolerohen.

Sakaq policia deklaron se gjatë protestës që përshkallëzoi në akte dhune ndaj forcave të rendit, përballë godinës së sallave plenare të Kuvendit të Shqipërisë janë plagosur 6 efektivë të Policisë së Shtetit.

Konstatohet se efektivët janë lënduar me mjete të forta dhe piroteknike, hedhur nga tubuesit mbi punonjësit e Policisë, të cilat dhe janë dërguar në spital për ndihmë të specializuar mjekësore.

“Një punonjëse policie ka dëmtime më të rënda në krahë. Policia e Shtetit u bën thirrje protestuesve dhe përfaqësuesve politikë për distancim nga dhuna dhe nga goditjet ndaj punonjësve të rendit”, sqaron policia.

Gjithçka ndodhi teksa protestuesit shtyn kordonin e policisë në tentativë për të hyrë në Parlament, ku po fliste Kryeministri Edi Rama, i cili i cilësoi banorët si “uzurpues profesionistë”, duke thënë se nuk do të marrin dëmshpërblim. /a.y/noa.al

Përplasja me banorët e Unazës së Re, lëndohen 6 efektivë të policisë

Banorët e Unazës së Re, përplasen keq me policinë te Parlamenti, tym dhe shashka

Rama i prerë me banorët e Unazës së Re: Mos na dilni para! As bëhet fjalë dëmshpërblimi