Ambasadori i Shteteve të Bashkuara të Amerikës ka reaguar pas deklaratave të ish-kryeprokurorit Adriatik Llalla sipas të cilit diplomati i kishte kërkuar arrestimin e presidentit Ilir Meta.

Në një reagim për Balkanweb, ambasadori Lu deklaron se kjo është një gënjeshtër absurde e ish-kryeprokurorit i cili tashmë rrezikon të shkojë në burg.

Sipas Lu, gënjeshtra e Adriatik Llallës është një fyerje për presidentin Meta dhe popullin shqiptar.

“Ish-Prokurori i Përgjithshëm Llalla është një zyrtar publik i korruptuar dhe diskredituar, i cili është nën hetim aktiv për pastrim parash dhe pasuri masive të pashpjeguara. Nuk është për t’u habitur që vazhdon të flasë kundër reformës në drejtësi sepse tani rrezikon të shkojë në burg për korrupsionin e tij. Ai ka pretenduar se brenda katër muajsh nga mbërritja ime në Tiranë, unë i paskam thënë të arrestojë ish-Kryetarin e Kuvendit Ilir Meta. Kjo është një gënjeshtër absurde nga Z. Llalla, pa kurrfarë baze në fakte. Gënjeshtra e tij fyese është një ofendim për Presidentin Meta dhe popullin shqiptar”, deklaron Donald Lu./a.m./noa.al/