Kryeministri Edi Rama, lëshon një apel dhe paralajmërim ndaj Bashkimit Evropian dhe Shteteve të Bashkuara të Amerikës për atë që ai e quan ndikimin e Rusisë në vendet ballkanike. 

“Influenca e Rusisë mbi Ballkanin është më e fuqishme se më parë, e sidomos në qarqet politike të Serbisë dhe Malit të Zi. Kjo nuk është diçka tërheqëse për shoqërinë, pasi politikat ruse nuk korrespondojnë me ambiciet e Ballkanit për t’ju bashkuar BE-së“, shprehet z. Rama.

Apelin z.Rama e bëri në një intervistë për gazetën britanike ‘The Telegraph’, ku ka folur për një sërë çështjesh, përfshirë sistemin e drejtësisë, situatën në rajon si dhe progresin e shënuar nga Shqipëria si një vend ish-komunist. 

Sa i përket ndryshimeve në sistemin gjyqësor, shefi i ekzekutivit deklaron se opozita e tanishme, ka qëndruar për shumë kohë në pushtet si dhe ka arsyet e saj për t’ju frikësuar transformimit rrënjësor në këtë fushë.

Më tej, Rama ka folur edhe për shfaqjen e pikturave të tij në ekspozita të njohura në mbarë botën, teksa shton se pasioni i tij e ndihmon që të përqendrohen.

Në lidhje me çështjen ‘Brexit’, Kryeministri shqiptar nënvizon se kjo ishte një zgjedhje demokratike dhe sovrane e popullit britanik, por shton se kjo gjeneratë e Evropës nuk duhet të harrojë se BE-ja është mbi të gjitha një projekt për paqe dhe siguri, dhe në plan të dytë një bashkim për një treg të lirë dhe të përbashkët. 

Rama ka folur ndër të tjera edhe për tranzicionin politik në Shqipëri, duke theksuar se shumë gjëra kanë ndryshuar për mirë në vend, që prej rënies së sistemit komunist. /noa.al