Luis Enrique, trajneri i PSG, analizoi humbjen e ngushtë në ndeshjen e parë gjysmëfinale të Ligës së Kampionëve kundër Borussia Dortmundit: “Mendoj se ishte një ndeshje shumë intensive, me dy skuadra që përpiqeshin të shkonin te goli duke ushtruar presion sa më lart".

A jeni i befasuar nga kjo Borussia?

Jo, sepse e njohim mirë njëri-tjetrin. Ne kishim shumë mundësi për të shënuar si ata, por kundërshtari ishte më i saktë para portës. Ne nuk e kishim këtë ftohtësi para portës së Borussia Dortmundit, rrallë ndodh që ta godasësh dy herë shtyllën në të njëjtin aksion, por futbolli është i tillë. Përpiqemi të mësojmë nga të gjitha këto gjëra, tashmë le të mendojmë për kthimin në Paris, e cila mund të na japë finalen.

Marquinhos foli për shumë gabime të bëra…

Futbolli është bërë me gabime, le të mendojmë për diçka tjetër.

Si ju duk Dembele në këtë ndeshje?

Ousmane nuk ka cilësinë e tij më të mirë në fazën mbrojtëse. Ai u përpoq të mbronte, më pas të centralizohej në fazën sulmuese. Ne u përpoqëm të kishim më shumë densitet me Dembele në qendër për t’i frenuar kundërshtarët.

Si duket dëmtimi i Lucas Hernandez, i zëvendësuar pas golit të Fullkrug?

Nuk kam asnjë lajm, nuk më duket gjë e mirë, por le të presim.

A jeni optimist për gjysmëfinalen e kthimit?

Absolutisht po, askush nuk tha se do të ishte e lehtë këtu. Jemi në gjysmëfinale të Champions League, ka pak zhgënjim, morali është pak i ulët për momentin, por do të japim gjithçka pas një jave në Paris për finalen. Kishim tre mijë tifozë nga Parisi, ata na mbështetën gjatë gjithë ndeshjes. Kur të kthehemi do ta kemi të gjithë stadiumin me vete, pastaj nuk kemi asgjë për të humbur.