Dënimi i Dani Alves për sulm seksual ndaj një vajze të re në një klub nate të Barcelonës po i shkakton futbollistit probleme përtej atyre gjyqësore. Tashmë është bërë i ditur lajmi se në vendlindjen e tij në Brazil, Juazeiro, statuja me përmasa reale në ‘shëtitoren detare’ është hequr për shkak të ankesave të panumërta të qytetarëve, që u pasqyruan në bashkinë e qytetit, për shkak të skandalit në të cilin u përfshi ish-mbrojtësi i Barcelonës.

Qyteti ku ka lindur futbollisti ka 220 mijë banorë dhe ndodhet në shtetin Bahia (në veriperëndim). Sipas informacioneve të Ministrisë Publike, heqja e monumentit është bërë këtë të hënë, më 29 prill, në bazë të respektimit të ligjeve aktuale.

Statuja është hequr gjatë natës, për të shmangur incidentet e mundshme. Kjo është bërë pa njoftim paraprak. Natyrisht, duhet theksuar se monumenti, që kur u bë i ditur hetimi për sulmin seksual dhe dënimi i mëpasshëm, ka qenë cak i protestave dhe akteve të ndryshme vandaliste të qytetarëve, sidomos të atyre që merren me mbrojtjen e të drejtave të grave. Protestat e tyre treguan se kjo statujë nuk mund të qëndronte aty, pasi ishte nderim për një futbollist të dënuar për përdhunim.

Për më tepër, dhe pas disa debateve në zyrën e kryetarit të qytetit të Alves, heqja e statujës është kryer për shkak se shkel legjislacionin e bashkisë së Juazeiro dhe të shtetit Bahia. Zëri i parë që nuk u pajtua me statujën ishte ai i aktivistes Manuella Tyler, e cila deklaroi se prania e saj në rrugët e qytetit vë në pikëpyetje "vlerën dhe dinjitetin e grave".

Në fakt, më 8 Mars, me rastin e Ditës Ndërkombëtare të Gruas, një grup i madh grash qëndruan rreth statujës me pankarta ku shkruhej "jo kulturës së përdhunimit".

Duhet mbajtur mend se Daniel Alves u dënua më 22 shkurt me 4 vite e 6 muaj burg për sulm seksual ndaj një vajze 23-vjeçare në një klub nate në Barcelonë. Megjithatë, pas 430 ditësh burg, ai u lirua përkohësisht përkundrejt garancisë pasurore prej 1 milion euro, deri në përfundimin e gjykimit në Apel.