TIRANË – Protestuesit kanë vijuar edhe mbrëmjen e kësaj të marte marshimin në rrugët e kryeqytetit, duke kërkuar dorëheqjen e kryeministrit Edi Rama dhe anulimin e projektit të Zvërnecit.

Me pankarta në duar dhe flamuj kombëtarë, qytetarët kanë përshkuar disa prej akseve kryesore të Tiranës, ndërsa kanë artikuluar thirrje si: “Shqipëri e Re”, “Edi Rama dorëhiqu”, “Gënjeshtrave iu erdhi fundi” dhe “Opozita jemi ne”.

Sipas organizatorëve, protesta ka hyrë në ditën e saj të dhjetë, ndërsa ata pretendojnë se pjesëmarrja ka ardhur në rritje nga dita në ditë. Në tubim janë bashkuar qytetarë të grupmoshave të ndryshme, përfshirë të rinj, studentë, artistë, aktivistë, familjarë me fëmijë dhe pensionistë.

Protestuesit kanë ritheksuar se kërkesat e tyre kryesore mbeten anulimi i projektit të Zvërnecit, mbrojtja e zonave të mbrojtura dhe largimi i qeverisë aktuale. Marshimi është zhvilluar pa incidente, ndërsa pjesëmarrësit kanë paralajmëruar vijimin e protestave edhe në ditët në vijim.