Kombëtarja shqiptare e vajzave ka shkruar historinë mbrëmjen e së martës, duke mposhtur 5-2 Malin e Zi në stadiumin Loro Boriçi dhe duke siguruar për herë të parë kualifikimin në raundin e parë të play-off-it për FIFA Women’s World Cup 2027.

Skuadra e drejtuar nga Armir Grima zhvilloi një paraqitje mbresëlënëse, duke përmbysur rezultatin dhe dominuar sfidën përballë tifozëve shqiptarë.

Ndeshja nisi me raste të shumta për kuqezinjtë, por ishte Mali i Zi që kaloi i pari në avantazh në minutën e 20-të. Reagimi i Shqipërisë ishte i menjëhershëm, teksa kapitenia Megi Doçi barazoi nga pika e bardhë në minutën e 22-të, pasi portierja kundërshtare u ndëshkua me karton të kuq.

Megjithatë, malazezet rikthyen avantazhin në fundin e pjesës së parë, por vetëm pak çaste më vonë Fortesa Berisha vendosi sërish ekuilibrat, duke mbyllur 45 minutat e para në shifrat 2-2.

Në pjesën e dytë, Shqipëria dominoi plotësisht takimin. Dopieta e Megi Doçit në minutën e 63-të solli përmbysjen, ndërsa më pas realizuan edhe Gresa Berisha dhe Arbiona Bajraktari, duke vulosur fitoren spektakolare 5-2.

Falë këtij suksesi, Kombëtarja shqiptare e vajzave siguron kualifikimin në play-off-in e Botërorit 2027, konfirmon qëndrimin në Ligën B dhe vendos një rekord të ri, duke grumbulluar për herë të parë 7 pikë në një grup të Ligës B.

Një mbrëmje historike për futbollin e vajzave në Shqipëri dhe një tjetër hap i rëndësishëm në rrugën e zhvillimit të këtij sporti në vend.