Kryeministri Edi Rama ka vijuar ironitë ndaj influencerëve dhe blogerëve gjatë fjalës së tij në 35-vjetorin e Partisë Socialiste në Fier, duke komentuar edhe një incident teknik gjatë aktivitetit, ku mikrofoni nuk funksionoi për disa momente.

“Te unë e gjetët të ngecte mikrofoni. Doni që të thonë blogerët që i iku goja Ramës, se ata në fakt kanë shumë gojë”, u shpreh Rama, duke iu referuar reagimeve të mundshme në rrjetet sociale.

Në fjalën e tij, kryeministri deklaroi gjithashtu se Fieri mbetet një nga qendrat kryesore të socialistëve, ndërsa solli në vëmendje historikun e marrëdhënieve politike në këtë qark.

Rama komentoi edhe protestat e ditëve të fundit në Tiranë, të lidhura me çështje mjedisore dhe projektet zhvillimore në vend, duke mbrojtur politikat e qeverisë për mbrojtjen e zonave natyrore.

Ai përmendi ndalimin e gjuetisë dhe, sipas tij, përmirësimin e gjendjes së ekosistemeve në vend, përfshirë lagunat dhe zonat e mbrojtura si Karavastaja dhe lumi Vjosa, i shpallur Park Kombëtar.

Kryeministri kritikoi sërish influencerët dhe mënyrën se si, sipas tij, trajtohen këto tema në rrjetet sociale, duke i lidhur me keqinformimin dhe perceptimet e krijuara online.

“Protestojnë për mjedisin dhe parkojnë makinat në rërë. Dalin në Instagram me lloj-lloj postimesh… kjo është të kesh dy b***, një ta mbash e një ta çash”, u shpreh Rama, duke iu referuar sjelljes në rrjetet sociale dhe në protesta.

Ai theksoi se Shqipëria, sipas tij, ka bërë përparim në mbrojtjen e natyrës dhe në menaxhimin e zonave të mbrojtura, ndërsa shtoi se debati publik duhet të bazohet në fakte dhe jo në narrativa të rrjeteve sociale.