Një operacion i Policisë së Shtetit në zonën e Velipojës ka çuar në zbulimin dhe asgjësimin e 7,446 bimëve të dyshuara narkotike Cannabis Sativa, të kultivuara në fshatin Reç i Ri, në Njësinë Administrative Velipojë.

Pas konstatimit të rastit, Drejtori i Përgjithshëm i Policisë së Shtetit, Drejtues Madhor Skender Hita, ka urdhëruar pezullimin nga detyra të tre punonjësve të policisë, të cilët mbulonin territorin ku u zbuluan parcelat me bimë narkotike.

Sipas njoftimit zyrtar, janë pezulluar nga detyra Shefi i Komisariatit të Policisë Shkodër, Kryekomisar B. L., Shefi i Stacionit të Policisë Velipojë, Nënkomisar Z. M., si dhe Ndihmësspecialisti i Policimit në Zonë, Inspektor S. K., përgjegjës për territorin ku u gjetën bimët.

Po ashtu, Drejtoria e Standardeve Profesionale ka nisur hetim disiplinor ndaj dy efektivëve të tjerë të Policisë së Velipojës, të cilët ishin pjesë e grupit të kontrollit të territorit. Bëhet fjalë për Nënkomisar D. N., Specialist për Hetimin e Krimeve, dhe Inspektor E. I., Ndihmësspecialist i Policimit në Zonë. Për këta punonjës është vendosur vijimi i hetimit disiplinor pa masë pezullimi nga detyra.

Sipas Policisë së Shtetit, ndërhyrja u ndërmor menjëherë pas marrjes së një informacioni në adresën elektronike të Drejtorit të Përgjithshëm të Policisë, ku denoncohej kultivimi i mijëra bimëve narkotike në një territor të hapur dhe lehtësisht të verifikueshëm në zonën fushore të Reçit të Ri.

Paralelisht me asgjësimin e bimëve narkotike, autoritetet kanë nisur veprimet hetimore për identifikimin dhe vënien përpara përgjegjësisë ligjore të personave të përfshirë në kultivimin e tyre.

Policia e Shtetit theksoi se lufta kundër kultivimit të bimëve narkotike mbetet një nga prioritetet kryesore të institucionit dhe se çdo rast i neglizhencës apo mospërmbushjes së detyrës nga punonjësit e policisë do të trajtohet me masa të rrepta administrative dhe ligjore.

Autoritetet kanë garantuar se aksionet kundër kultivimit të lëndëve narkotike do të vijojnë në të gjithë territorin e vendit, ndërsa përgjegjësit do të mbajnë përgjegjësi, pavarësisht funksionit që ushtrojnë.