Një debat i tensionuar u zhvillua mes kryeministrit Edi Rama dhe një gazetareje rumune të PRO TV gjatë konferencës me gazetarët europianë, raporton noa.al.

Shkak u bë një pyetje lidhur me projektet e zhvillimit në ishullin e Sazanit dhe në bregdet, ku gazetarja këmbënguli se një prej projekteve ishte anuluar, ndërsa Rama mohoi kategorikisht një gjë të tillë.

Përplasja verbale u ashpërsua, me kryeministrin që akuzoi gazetaren se kishte ardhur e ndikuar nga informacione të pavërteta, ndërsa kjo e fundit këmbënguli se dispononte regjistrimin e deklaratave të tij.

Ja si Edi Rama debatoi me një gazetare rumune të PRO TV gjatë konferencës me gazetarët europianë:

Gazetarja: Kemi dy projekte, atë të ishullit të Sazanit dhe një në bregdet.

Rama: Nuk kemi dy projekte, kemi dy zona zhvillimi. Fjalët sot janë të rëndësishme, kemi dy vendndodhje.

Gazetarja: Në bregdet, projekti është anuluar apo pezulluar?

Rama: Si dreqin flas e flas dhe…

Gazetarja: Po, por ju thatë në fillim, e kemi edhe regjistrimin, që është anuluar.

Rama: Ju keni regjistrimin, unë kam Alzheimer? Po, jo?

Gazetarja: E thatë në fillim që është anuluar.

Rama: Nuk thashë asnjëherë që është anuluar ndonjë gjë, sepse nuk ka pasur kurrë një projekt për t’u anuluar. Nuk është në rregull. Vini këtu me kokën e mbushur me gënjeshtra që ju kanë bllokuar trurin.

Gazetarja: Trurin e kam shumë në rregull.

Rama: Trurin e keni në rregull, por problemi është sa i hapur është ai për faktet. Nuk është në rregull dhe nuk e pranoj. Më thoni diçka që unë nuk e kam thënë kurrë, sepse keni ardhur të bindur se ka ekzistuar një projekt që është anuluar.