SHKODËR, 9 qershor 2026 – Policia e Shkodrës ka vënë në pranga një person të dyshuar për përfshirje në dhunimin e drejtorit të Autoritetit Kombëtar të Ushqimit (AKU) në Shkodër, Romir Haderi.

Sipas burimeve policore, i arrestuari është Elis Çela, banues në lagjen “Kiras”, i cili dyshohet se ka ndihmuar në kryerjen e ngjarjes duke transportuar me automjet autorin e dyshuar të sulmit.

Hetimet kanë çuar gjithashtu në identifikimin e personit që dyshohet si autori kryesor i agresionit ndaj drejtorit të AKU-së. Ky shtetas është shpallur në kërkim, ndërsa strukturat e policisë vijojnë operacionet për lokalizimin dhe arrestimin e tij.

Ngjarja ndodhi mbrëmjen e 21 majit në lagjen “Rus” të Shkodrës, ku Romir Haderi u sulmua nga një person i paidentifikuar, i cili e goditi me një send të fortë dhe më pas u largua nga vendi i ngjarjes. Si pasojë e sulmit, Haderi pësoi një dëmtim në zonën e vetullës dhe, pas marrjes së ndihmës mjekësore në spital, u kthye në banesë.

Një ditë pas incidentit, drejtori i AKU-së reagoi publikisht, duke deklaruar se sulmi nuk do ta ndalonte në ushtrimin e detyrës së tij.

Sipas dyshimeve paraprake të hetuesve, ngjarja mund të lidhet me detyrën e zyrtarit të AKU-së. Burime nga hetimi bëjnë me dije se personat e përfshirë dyshohet se kanë vepruar kundrejt pagesës, ndërsa porositësit e mundshëm të sulmit ende nuk janë identifikuar.

Policia dhe Prokuroria po vijojnë hetimet për zbardhjen e plotë të rrethanave, motivit dhe personave të tjerë që mund të jenë përfshirë në këtë ngjarje.