TIRANË, 9 Qershor 2026 – Pesë ditë pas zhdukjes pa gjurmë të 34-vjeçarit Eglant Koçi, dyshimet janë rritur se ai mund të jetë vrarë.

Sipas të dhënave të fundit hetimore që citon Top Channel, i riu dyshohet se është ekzekutuar nga shoku i tij i ngushtë, Armand Shakaj.

41 vjeçari dyshohet se pas krimit e ka zhdukur trupin e viktimës dhe vetë është larguar në drejtim të paditur.

Këqyrja e kamerave të sigurisë ka qenë vendimtare për zbardhjen e itinerarit të fundit të Koçit, i cili paraditen e 4 qershorit ka lëvizur nga sheshi “Wilson” drejt Bulevardit “Zhan D’Ark”.

Ai është futur në ambientet e një lokali në pronësi të Shakajt dhe nuk ka dalë më që andej gjallë.

Dyshimet e deritanishme të hetuesve të Krimeve të Rënda në Policinë e Tiranës lidhen me një sasi parash digjitale që 34-vjeçari posedonte në aparatin e tij celular. Kjo pistë po konsiderohet si një nga motivet kryesore që mund të ketë çuar në rrëmbimin e tij.

Grupi hetimor ka mbledhur prova materiale në terren që hedhin dyshime në pistën e vrasjes.

Dyshohet se trupi i pajetë i 34-vjeçarit është nxjerrë nga mjedisi dhe është transportuar me një automjet drejt periferisë së kryeqytetit, ku blutë po vijojnë kontrollet intensive për gjetjen e tij.

Dëshmitar në këtë ngjarje të rëndë rezulton të ketë qenë shtetasi Enea Zyferi, 25 vjeç, i cili punonte si kamarier në lokalin e autorit të dyshuar dhe që tashmë është arrestuar nga policia si bashkëpunëtor për përkrahje të autorit të krimit.

Ndërkaq, për të humbur gjurmët, 41-vjeçari Armand Shakaj ka zhvendosur motorin e viktimës nga vendi i ngjarjes drejt rrugës “5 Maji”, ku u gjet i braktisur dy ditë më vonë.

Eglant Koçi

Ndonëse zyrtarisht Eglant Koçi figuronte i punësuar në një mobileri, policia ka fokusuar hetimet në aktivitetin e kriptomonedhave dhe transaksioneve me para cash ku viktima dyshohet se ishte i përfshirë, si motivi kryesor i këtij ekzekutimi. Armand Shakaj mbetet ende në kërkim policor. TCh