Publikimi i tezave, Ministria: Nuk ndikon në provimin e Gjuhës Shqipe dhe Letërsisë

Pas publikim të Variantit B të tezës së Gjuhës Shqipe dhe Letërsisë vetëm pak minuta nga nisja e provimit, Ministria e Arsimit ka reaguar me të njëjtën linjë mbrojtëse si në vitet e kaluara.

Përmes një deklarate zyrtare, dikasteri i arsimit ka këmbëngulur se ky akt i izoluar nuk ndikon në asnjë mënyrë në mbarëvajtjen, zhvillimin apo integritetin e provimit, i cili sipas tyre po vijon normalisht në të 144 qendrat e testimit në mbarë vendin.

Sipas njoftimit zyrtar, rrjedhja e fotografive të testit ka ndodhur nga një qendër provimi në Qarkun e Kukësit.

Autoritetet konfirmuan se maturanti përgjegjës është identifikuar dhe përjashtuar menjëherë, ndërsa u paralajmëruan penalizime të ashpra për të gjithë zinxhirin e administratorëve të përfshirë në atë qendër. Ministria dënoi aktin duke u shprehur se një veprim i tillë nuk mund të zbehë punën e mijëra mësuesve dhe mbi 2 mijë administratorëve që menaxhojnë procesin për 26,600 nxënësit që i nënshtrohen testimit.

Pavarësisht këtyre argumenteve dhe thirrjeve për një proces meritokratik e me standarde të larta, përsëritja e të njëjtit skenar ka nxitur sërish pikëpyetje dhe kritika të forta publike mbi efikasitetin e kontrolleve dhe sigurinë e sekretit shtetëror në provimet e Maturës.