Kryeministri Edi Rama ka thyer heshtjen përballë valës së protestave masive që kanë përfshirë vendin, duke dhënë dy intervista të rëndësishme për rrjetet prestigjoze mediatike Al Jazeera dhe Reuters. Shefi i ekzekutivit ka qenë i prerë në qëndrimin e tij, duke deklaruar se fati i megaprojektit turistik prej 4 miliardë dollarësh në Zvërnec nuk ka qenë kurrë në pikëpyetje dhe se ai do të shkojë përpara, pavarësisht tubimeve që po zhvillohen para selisë së qeverisë.

I pyetur mbi akuzat e ashpra të opozitës dhe protestuesve se po "shet vendin", Rama sqaroi për Al Jazeera se qeveria shqiptare nuk ka asnjë lidhje direkte me këtë projekt, pasi bëhet fjalë për një transaksion tërësisht privat. Sipas tij, investimi gjigant po realizohet mbi një pronë private nga dy vëllezërit investitorë arabë, Al-Khayyat, dhe bazohet mbi një marrëveshje mes palëve private. "Ky është një bekim për vendin. Një investim prej 4 miliardë eurosh në një vend që ka një Prodhim të Brendshëm Bruto prej rreth 27 miliardë eurosh e ca, flet vetë," ka nënvizuar kryeministri.

Nga ana tjetër, në një prononcim për agjencinë e lajmeve Reuters, Rama ka konfirmuar se nuk do të ketë asnjë tërheqje apo anulim të projektit. Ai madje dha edhe afatet e para konkrete, duke u shprehur se një pjesë e konsiderueshme e këtij resorti luksoz pritet të hapë dyert për publikun dhe turistët përpara përfundimit të kësaj dekade. Ndërkohë që reagimet ndërkombëtare shtohen, brenda vendit debati mbetet i ndezur, teksa organizatorët e protestave po përgatiten për tubimin e tyre të dhjetë radhazi në kryeqytet.