Detaje të reja kanë dalë në dritë nga operacioni i fundit i policisë në Vlorë, i cili ka mundësuar zbardhjen e plotë të plagosjes me armë zjarri të ndodhur më 7 qershor. Autoritetet zyrtare konfirmojnë se në pranga ka rënë shtetasi Turi Aligjoni, 55 vjeç, i identifikuar si autori i dyshuar i plagosjes së 27-vjeçarit Kevi Lazaj. Bashkë me të, forcat e rendit kanë arrestuar edhe një 48-vjeçar, i cili akuzohet si i përfshirë në të njëjtin rrjet.

Të dy këta shtetas ishin të shpallur në kërkim kombëtar për një sërë veprash të rënda penale, duke filluar nga “Plagosja e rëndë me dashje”, “Mbajtja pa leje dhe prodhimi i armëve”, e deri te “Përkrahja e autorit të krimit” dhe “Prodhimi e shitja e narkotikëve”.

Gjatë ndërhyrjes së suksesshme, strukturat e policisë kanë sekuestruar katër armë zjarri pistoleta të markave mjaft të fuqishme si „Glock“, „Sig Sauer“ dhe „Canik“, një sasi të konsiderueshme municioni luftarak, shtatë telefona celularë dhe një vlerë prej 1850 eurosh. Gjithashtu, janë bllokuar tre automjete, dy prej të cilave mbanin targa të huaja, ndërsa njëri ishte i blinduar.

Nga hetimet paraprake ka rezultuar se një prej mjeteve të sekuestruara, pikërisht ai i tipit „BMW X5“, është përdorur nga Turi Aligjoni për t’u larguar me shpejtësi nga skena e krimit menjëherë pas plagosjes së të riut Lazaj. Aktualisht, Policia dhe Prokuroria e Vlorës po vijojnë veprimet e thelluara hetimore për dokumentimin e plotë ligjor të të gjithë aktivitetit kriminal të këtij grupi, si dhe për identifikimin e personave të tjerë që mund të kenë lidhje me këtë ngjarje.