Në foto Xhovana Nikolli dhe Xhuana Nikolli

Tiranë – Një 25-vjeçare nga Lezha, Xhuana Nikolli, ka ndërruar jetë në Qendra Spitalore Universitare “Nënë Tereza”, pasi dyshohet se u vetëhelmua me fostoksinë. Ngjarja ka ngritur dyshime për dhunë në familje, ndërsa policia ka shpallur në kërkim bashkëshortin e saj.

Sipas burimeve zyrtare, familjarët e të resë kanë bërë kallëzim në Komisariati i Policisë Nr. 2 në Tiranë ndaj bashkëshortit të saj, shtetasit me inicialet E.F., duke pretenduar se ai ushtronte dhunë fizike dhe psikologjike ndaj saj.

Raportohet se në trupin e 25-vjeçares janë konstatuar edhe shenja dhune, ndërsa ndaj bashkëshortit është nisur procedimi penal për veprat “dhunë në familje” dhe “shkaktim i vetëvrasjes”. Policia ka ushtruar kontrolle edhe në banesën e tij në Lezhë, por ai nuk është gjetur, ndërsa vijojnë kërkimet për kapjen e tij dhe marrjen në pyetje lidhur me akuzat e ngritura.

Xhuana Nikolli jetonte në Shëngjin dhe kishte përfunduar studimet për drejtësi. Lajmi për vdekjen e saj ka shkaktuar reagime të shumta në rrjetet sociale, ku miq dhe të afërm kanë shprehur dhimbjen dhe ngushëllimet për ndarjen e saj të parakohshme nga jeta.

Ndërkohë, ngjarja shkaktoi edhe konfuzion në rrjetet sociale, pasi fillimisht u përhap lajmi se viktima ishte Xhovana Nikolli, një personazh i njohur në rrjetet sociale. Kjo u përgënjeshtrua më pas nga vetë ajo përmes një reagimi publik.