Identifikohet autori i plagosjes te Delijorgji, zbardhen arsyet e konfliktit në restorant

Detaje të reja kanë dalë nga ngjarja e ndodhur pasditen e sotme në zonën rezidenciale të Delijorgjit, në Rrugën e Kavajës në Tiranë, ku mbeti i plagosur me armë zjarri një 34-vjeçar.

I dëmtuari është Akil Koxhaxhiku, 34 vjeç, banues në Tiranë. Sipas informacioneve zyrtare, ai është qëlluar në bark rreth orës 15:50, jashtë një lokali në zonën e pallateve Delijorgji. Koxhaxhiku është transportuar menjëherë në spital dhe ndodhet jashtë rrezikut për jetën, nën kujdesin e mjekëve.

Autoritetet kanë identifikuar si autor të dyshuar shtetasin Besjan Ferazini, i cili është shpallur në kërkim. Policia ka nisur operacionet për kapjen e tij, ndërsa grupi hetimor po vijon punën për zbardhjen e plotë të rrethanave dhe dokumentimin ligjor të ngjarjes.

Sipas burimeve nga policia, konflikti dyshohet të ketë ndodhur për motive xhelozie. Paraprakisht, mësohet se 34-vjeçari ishte duke drekuar në një bar-restorant së bashku me partneren e tij, kur ka pasur një debat me të dyshuarin, i cili dyshohet se lidhej me hedhje fjalësh apo ngacmime ndaj të fejuarës.

Situata ka precipituar në tension, dhe në një moment autori i dyshuar ka nxjerrë armën e zjarrit që dyshohet se e mbante me vete, duke qëlluar një herë në drejtim të Koxhaxhikut dhe duke e plagosur në bark.

Pas ngjarjes, partnerja e të plagosurit ka arritur ta ndihmojë atë dhe ta transportojë me automjet drejt një spitali privat për të marrë ndihmën e nevojshme mjekësore.

Policia vijon hetimet për të sqaruar plotësisht motivet e konfliktit dhe për të siguruar të gjitha provat që do të çojnë në dokumentimin e plotë ligjor të kësaj ngjarjeje.