Michigan-Një 44-vjeçar shqiptar ka humbur jetën pas një ngjarjeje të ndodhur jashtë restorantit ku punonte në shtetin e Michigan, SHBA. Viktima, Françesk Shkambi, ishte bashkëpronar dhe menaxher i përgjithshëm i restorantit “Prime 7”.

Sipas mediave amerikane, Shkambi kishte dalë jashtë lokalit pas një telefonate, moment kur është qëlluar. Autoritetet raportojnë se ai u dërgua menjëherë në spital, por nuk arriti t’u mbijetojë plagëve.

Sherifi Michael Bouchard deklaroi se viktima dhe personi i dyshuar e njihnin njëri-tjetrin dhe se mes tyre kishte pasur një mosmarrëveshje që të paktën parapriste ngjarjen.

I dyshuari, një 65-vjeçar nga zona e Farmington Hills, është vetëdorëzuar dhe po mbahet në Qarkun Oakland. Ai ka dhënë një deklarim fillestar, ndërsa autoritetet nuk kanë bërë publik motivin e plotë.

Autori i dyshuar i vrasjes është identifikuar si Tonin Pjetri.

Gjatë hetimeve është sekuestruar edhe një armë zjarri e tipit pistoletë 9 mm, që dyshohet të jetë përdorur në ngjarje dhe ishte raportuar e vjedhur.

Nipi i viktimës tha për CBS Detroit se i 65 vjeçari ishte mik i Franceskut. “Ishte mik i tij”, tha Mark Gjura. “Ai ka ardhur këtu dhe ka ngrënë darkë me ne në të kaluarën. Gjatë ndeshjes së Lions, mora një telefonatë nga miqtë që më thanë se kishte pasur të shtëna në Prime 7 sepse unë punoja atje, dhe mamaja ime tha: ‘Është Franco, është Franco’, dhe pastaj nxituam për në spital të gjithë së bashku si familje.”

Stafi i restorantit është shprehur i tronditur. Kolegu i tij, Alex Crawford, u shpreh: “Ai kishte zemër të madhe dhe na bëri të gjithë si familje. Do të na mungojë jashtëzakonisht shumë.”

Hetimet vijojnë, ndërsa priten të publikohen detaje të tjera gjatë procedurave gjyqësore.