Bulqizë, 4 nëntor 2025 – Një ngjarje e rëndë është regjistruar paraditen e sotme në një subjekt minerar në zonën e Theknës, Martanesh, ku ka humbur jetën administratori i kompanisë.

Sipas të dhënave paraprake, rreth orës 10:15, gjatë kontrollit në frontin e punës, është aksidentuar shtetasi Sulejman Kurti, 62 vjeç, i cili, si pasojë e dëmtimeve të marra, ka ndërruar jetë në vendngjarje.

Në vijim të veprimeve, Policia ka shoqëruar disa persona të stafit drejtues dhe teknik të subjektit minerar, me qëllim sqarimin e plotë të rrethanave të aksidentit.

Grupi hetimor, nën drejtimin e Prokurorisë, po vijon punën për dokumentimin e shkaqeve të ngjarjes dhe përcaktimin e përgjegjësive ligjore.