Zbulohet “Rregulli i Përqafimit” në Disney – Vizitorët ndajnë përvojat e tyre prekëse

Një praktikë e njohur si “Rregulli i Përqafimit i Disney-t” është bërë virale në TikTok dhe rrjete të tjera sociale, ku shumë përdorues po tregojnë përvojat e tyre personale me punonjësit e parqeve tematike të Disney-t.

Aktorët që luajnë rolin e personazheve si Miki, Stitch dhe të tjerë, përveç firmosjes së autografëve dhe pozimit për foto, ndjekin një rregull të pashkruar: nëse një fëmijë vendos të përqafojë personazhin, ata janë të detyruar ta mbajnë atë përqafim për aq kohë sa e dëshiron vetë fëmija – pa e ndërprerë.

Simon Sinek, autor dhe figurë e njohur publike, deklaroi kohët e fundit në emisionin e Jay Shetty:

“E mësova së fundmi. Është gjëja më e bukur në botë. Në Disney, të gjithë personazhet janë trajnuar që kur një fëmijë të përqafon, të mos e lëshosh përqafimin derisa të të lëshojë ai i pari.”

Kjo praktikë është konfirmuar edhe nga burime si faqja fan “Inside the Magic”, e cila citon se Walt Disney e kishte konsideruar këtë veprim si shprehje ndjeshmërie:

“Asnjëherë nuk e di sa shumë mund të ketë nevojë një fëmijë për atë përqafim.”

Tani, shumë njerëz pyesin nëse “Rregulli i Përqafimit” është pjesë zyrtare e trajnimit të Disney-t apo një model kulturor mirësjelljeje që aktorët e kanë bërë të tyren gjatë punës me fëmijët. /noa.al