Ofertat mund të kenë nisur në supermarkete, por çmimet për festat e fundvitit 2024 janë dukshëm më të larta se vitin e kaluar.

Ajo që vërehet është se ofertat bëhen kryesisht për produkte të cilësisë së dobët dhe shërbejnë më së shumti për shtresën e varfër.

Por kur bëhet fjalë për festën e vitit të ri, shqiptarët përpiqen të mos kursehen dhe të paktën një herë në vit, tavolinën ta kenë plot e përplot dhe me gjëra cilësore.

Ndaj në tryezën e vitit të ri nuk mungojnë gjeli i detit, antipastat e ndryshme, sallata, piket dhe ëmbëlsirat.

Disa zgjedhin të marrin një qengj të pjekur në hell, por duhet të përgatiten të paguajnë jo më pak se 20 mijë lekë të rinj.

Pjesa më e madhe zgjedhin gjelin e detit, por dhe ai është çdo vit e më shtrenjtë dhe shkon diçka më pak se një qengj.

Mishi i viçit ka arritur një vlera stratosferike dhe nëse zgjedh një pjesë të denjë për tryezë festive, ai shkon në 2.500 lekë për kilogram.

Bakllavaja është bërë dhe ajo një produkt luksi me çmime që nisin nga 4.500 lekë për një tepsi ndër të voglat.

Ajo që shqetëson edhe më shumë amvisat është cilësia e produkteve që blejnë.

"Vajta të marr një bakllava dhe ishte 6 mijë lekë, një tepsi që gjithsesi nuk ishte e madhe, sigurisht jo ajo pesëqindshja që kishim dikur.

Por më shqetëson se çfarë përdorin. Se unë e di që për të fituar sa më shumë, çfarë nuk fusin. Mielli i cilësie të dobët, arrat, gjalpi…", shprehet Valdetja, një grua 54 vjeçare teksa ndodhet në një supermarket në Tiranë ku po promovonin edhe bakllavanë.

Si Valdetja edhe të tjerë plot janë të shqetësuar për çmimet dhe cilësinë e produkteve.

Thuajse njëzëri ata shprehen: "Kemi frikë të blejmë sepse përballemi me problem të dyfishtë. Çmimi që Rritet përditë dhe cilësia e gjërave që blejmë. Përfundimisht nuk dimë se çfarë hamë".

Sa do të kushtojë këtë vit darka e vitit të ri për 6 persona?

Që një tavolinë festive të jetë e denjë duhet që në të të vendosim një gjel detit që bashkë me përsheshin, patatet dhe pilafin arrin në 20 mijë lekë.

Dhjetë mijë lekë të tjera nevojiten për antipasta dhe sallatra.

Rreth 5 mijë lekë duhen për bakllavanë dhe po aq të tjera për pijet dhe frutat.

Dhjetë mijë lekë të tjera mund të nevojiten për fishekzjarrë dhe aksesorë të tjerë festivë. /noa.al