Natyrisht kishte pritur më shumë se barazimi, si kreu i grupit tonë kualifikues. Ndoshta e kishte nënvlerësuar disi kombëtaren shqiptare, nuk ia kishte marfrë mendja kurrë se gjysmë e stadiumit “Fortuna Arena” do të mbushej me tifozë kuqezinj, por në fund pranoi realitetin e hidhur. Barazimin 1-1 e konsideroi turp për kombëtaren e tij, Republikën Çeke.

Fjala është për trajnerin e kombëtares çeke, Jaroslav Šilhavý, i cili u shpreh kështu pas sfidës së mbrëmshme: “Është padyshim si një humbje, jemi të zhgënjyer. Sidomos në pjesën e dytë, ne kishim disa shanse, e përmirësuam lojën, shënuam dy gola, por fatkeqësisht vetëm njëri ishte i vlefshëm.

Dhe më pas, pas gabimit tonë, i ofruam një gol kundërshtarit. Nuk mund ta kthenim më lojën në anën tonë. Është turp, duhej të kishim fituar".

A e ndërlikon ky barazim luftën për kualifikim në “Euro 2024”?

Fatkeqësisht kemi marrë vetëm një pikë, por gara për kualifikim vazhdon. Shqipëria do të luajë me Poloninë pas tri ditësh, ne do të shkojmë në kryeqytetin shqiptar pas kësaj, edhe kjo mund të tregojë shumë. Sa keq që nuk përfituam.

A ishit i kënaqur me paraqitjen në pjesën e parë?

Ne u befasuam. U përgatitëm me ndershmëri për ndeshjen, e dinim mirë se për çfarë bëhej fjalë, se ishte një duel i rëndësishëm. Më pas filluam të nervozoheshim, pa lëvizje, pa grintë. Pjesa e parë nuk na funksionoi. Më vjen mirë që e kemi përmirësuar lojën në të dytën dhe kemi bërë një paraqitje më të mirë.

Pse e zëvendësuat Václav Černý, lojtarin më aktiv çek, pas 70 minutash?

Nuk e di nëse ka qenë më aktivi, ndoshta ky është këndvështrimi juaj. Ne kishim sulmues të tjerë në stol, të cilët po ashtu prisnin shansin e tyre. Edhe për këtë arsye i aktivizuam për të përmirësuar lojën tonë.

Kush e kishte fajin për barazimin? Ishte humbja e topit nga Alex Král, apo dikush duhej të kishte performuar më mirë ndaj Nedim Bajramit?

E vërteta është ndoshta diku në mes. Nuk dua të vlerësoj apo ndëshkoj askënd, nuk e pashë saktësisht. Por ndoshta është humbja e Alex, më pas golashënuesi shqiptar e shfrytëzoi shumë mirë. Goditi shkëlqyeshëm.