Transmetuar më 15-02-2023, 06:30

Një qytetar në Pogradec dhunohet egërsisht nga një oficer policie, i cili e ka kapur në një shkallë pallati, në korridorin e katit të parë dhe e godet vazhdimisht.

Pamjet tregojnë për rreth 75 sekonda, një dhunë të përzier me marrje në pyetje nga polici, ndërsa i riu përpiqet të mbrohet me duart në kokë dhe duke u përbetuar.

Në një moment, polici që denoncuesi e identifikon me emrin Gjergji Riza, e flak nga shkallët qytetarin duke e nxjerrë jashtë pallatit dhe vazhdon ta godasë dhe shkelmojë.

Video u dërgua këto ditë pranë redaksisë së noa.al nga një qytetar i cili thotë se është skandalizuar nga dhuna që demonstrohet në pamjet filmike të një kamere sigurie.

Mësohet se personi i dhunuar është K. N., banor në Pogradec. Dyshimet janë se ai është parë nga oficeri i policisë si person që ka dijeni apo gisht në një ngjarje të janarit ku ishte tentuar djegia e një klinike.

Noa.al kërkoi një qëndrim nga drejtoria e policisë së Korçës që mbulon edhe Pogradecin dhe mbetet në pritje të një përgjigjeje.

Përditësuar: 14:32

Reagim i Drejtorisë Vendore të Policisë Korçë

Në lidhje me një video të publikuar në media, në të cilën shfaqet një shtetas që ushtron dhunë fizike ndaj një shtetasi tjetër, në korridorin e një pallati, dhe pas verifikimeve rezultoi se shtetasi që ka ushtruar dhunë është punonjës policie në Drejtorinë Vendore të Policisë Korçë, ju sqarojmë se:

Drejtori i Drejtorisë Vendore të Policisë Korcë ka pezulluar menjëherë nga detyra, punonjësin e Policisë, nënkomisar Gj. R., me detyrë specialist në Sektorin e Analizës Strategjike, Planifikimit, Monitorimit dhe Vlerësimit, në DVP Korçë.

Ndërkohë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit, për nisjen e menjëhershme të hetimit disiplinor, për këtë punonjës policie, për shkelje të rëndë.

Nga verifikimet paraprake rezulton se ngjarja ka ndodhur në korridorin e një pallati, në Pogradec, gjatë muajit janar të këtij viti, për shkak se shtetasi i dhunuar K. N. dyshohej se më datë 22.01.2023, gjatë natës, kishte tentuar të digjte klinikën e bashkëshortes së punonjësit të Policisë Gj. R.

Po nga verifikimet rezulton se shtetasi K. N., 35 vjeç, banues në Pogradec, është arrestuar më datë 07.02.2023, në kuadër të operacionit policor antidrogë të koduar “Pasagjeri”, për veprimtarinë kriminale të shitjes së drogave të forta.

Policia e Shtetit fton mediat dhe qytetarët, që të denoncojnë raste të abuzimit me detyrën, nga punonjësit e Policisë, duke i garantuar se nuk do të tolerojë asnjë punonjës policie që abuzon me atributet që iu jep detyra, në kohën e shërbimit apo dhe jashtë shërbimit.