Heshtja është e artë – por vetëm nëse nuk e gjeni veten në dhomën më të qetë në botë.

E keni parasysh atë frazën që përdorim shpesh: Dua qetësi.

E pra, qetësi mund të duash, por qetësi si kjo është e frikshme.

Microsoft ndërtoi atë që tani është në Librin e Rekordeve Botërore Guinness si vendi më i qetë në planet.

E njohur si dhoma anekoike në selinë e kompanisë në Redmond, Uashington, në "testet ultra të ndjeshme" doli se ka një nivel zhurme prej -20,35 dBA (decibelët me peshë A – një matje e nivelit të presionit të zërit).

Vetëm shumë pak njerëz kanë qenë në gjendje të përballojnë qëndrimin në dhomë për një periudhë të gjatë kohore – më së shumti një orë.

Por pse?

Pas disa minutastash, ju do të filloni të dëgjoni rrahjet e zemrës suaj. Disa minuta pas kësaj, ju mund të dëgjoni kockat tuaja e madje dhe gjakun që rrjedh.

Qëllimi i dhomës anekoike është pikërisht ai, të heqë të gjitha zhurmat e tjera të jashtme dhe t’ju lejojë të dëgjoni tingujt e pafund të trupit tuaj.

Por mos harroni se vetëm në vdekje trupi është plotësisht i heshtur.

Mjediset që ne i mendojmë si ultra të qetë janë zakonisht më të zhurmshëm se pragu i dëgjimit të njeriut, i cili është rreth 0 decibel.

Një dhomë leximi e bibliotekës, për shembull, mund të shkojë në rreth 40 decibel.

Pa asnjë zë nga bota e jashtme, heshtja e plotë si e kësaj dhome, do të shndërrohet gradualisht në një zhurmë të padurueshme në veshët tuaj.

Kjo ka të ngjarë t’ju bëjë të humbni ekuilibrin për shkak të mungesës së jehonës në dhomë, gjë që dëmton vetëdijen tuaj hapësinore.

“Kur ktheni kokën, madje mund ta dëgjoni edhe atë lëvizje. Mund ta dëgjoni veten duke marrë frymë dhe madje ju duket si e zhurmshme, me zë të lartë", thotë Hundraj Gopal, projektuesi kryesor i dhomës në Microsoft, citon noa.al.

Fjala anekoike do të thotë "pa jehonë".

U deshën dy vjet për të projektuar hapësirën e përbërë nga gjashtë shtresa betoni dhe çeliku.

Ajo është paksa e shkëputur nga ndërtesa përreth. Një grup burimesh kundër dridhjeve janë vendosur në të.

Brenda, pjesët e tekstilit me fije qelqi janë montuar në dysheme, tavan dhe mure për të thyer valët e zërit përpara se të kenë mundësinë të depërtojnë përsëri në dhomë.