Mes yjeve që shoqëronin Brazilin në “Katar 2022”, një nga favoritët e përhershëm për Kupën e Botës, por që zhgënjeu edhe kësaj here, ishte padyshim Richarlison. Sulmuesi ndryshoi skuadrën gjatë verës, kaloi nga Evertoni te Tottenham i Antonio Contes.

Ai menjëherë shkoi mirë me trajnerin italian dhe fitoi thirrjen e Tite në kombëtare. Edhe pse konkurrenca përpara te “Selecao” ishte e fortë, ai e tregoi veten në skenën më të rëndësishme. Sidoqoftë, Richarlison nuk i duhet domosdoshmërisht fusha e blertë për t’u bërë tituj mediash.

Karriera e tij është e mbushur me të paktën deklarata të veçanta, të cilat e sjellin atë në qendër të vëmendjes. Ashtu si koha kur tha se ushqimi i tij i preferuar anglez janë… makaronat. Këtë herë, siç rrëfen AS, ajo që bëri bujë ishte përgjigjja e një pyetjeje në dukje e thjeshtë, e bërë nga fansat e tij.

Pyetja që u bëhet shpesh futbollistëve, pavarësisht se Richarlison është vetëm 25 vjeç: “Çfarë do të bësh sapo t’i varësh këpucët në gozhdë?” Pavarësisht moshës së tij të re, lojtari i "Spurs" e kishte gati përgjigjen:

“Do të blej një ishull dhe do të shkoj atje me shumë femra, si Ronaldinho në atë foto…” Çdo referencë për Dinhon në pishinën e rrethuar nga vajza nuk është aspak e rastësishme. Një mendim që e bëri Richarlison të qeshte shumë.

Siç shpjegon gazeta spanjolle, futbollisti është kritikuar shumë, pasi konsiderohet një model jo tamam pozitiv për të rinjtë. Por thellë, si brenda dhe jashtë fushës, Richarlison ka qenë gjithmonë shumë i veçantë. Përveç golave, asisteve e madje edhe disa kartonëve të kuq, duhet nënvizuar se braziliani ka edhe një temperament të caktuar.

Sulmuesi është mjaft i turbullt dhe në Brazil e quanin “Banditi”. Kushdo që si ai ka lindur në një favelë, ku një nga mjetet e pakta të jetesës është trafiku i drogës, e di se duhet të jetë gjithmonë gati për të mbrojtur veten me të gjitha mjetet.

Historitë e shumta të fëmijërisë që ai tregoi, mes armëve dhe tregtarëve të drogës, na bëjnë të kuptojmë vështirësitë e përjetuara. Dhe kështu, nëse ëndrra e tij është të bëjë jetën… e Dinhos, në fund mund të qeshni me të.