Trishtimi i Cristiano Ronaldos për largimin nga Manchester United nuk zgjati shumë. Mjaftoi vetëm veshja e fanellës së Portugalisë dhe çdo mendim i hidhur u kthye në gëzim të pastër. 37-vjeçari e nisi Botërorin e Katarit direkt me një rekord, “qershia mbi tortë” për karrierën monstruoze të ish-sulmuesit të Real Madridit dhe Juventusit.
Duke shënuar golin e çastit 1-0 kundër Ganës nga pika e bardhë, Ronaldo hyri në historinë e Kupës së Botës. Më saktësisht, ai shënoi gol në edicionin e pestë, nga pesë të luajtur në Botëror. Kjo e bën atë lojtarin e parë dhe të vetëm në historinë e këtij kompeticioni madhor të kombëtareve të botës.
Ronaldo kishte shënuar tashmë të paktën një herë më 2006 në Gjermani, 2010 në Afrikën e Jugut, 2014 në Brazil (për ironi, po kundër Ganës) dhe më 2018 në Rusi. Mbrëmjen e djeshme shënoi edhe në Katar, ndaj hyn në historinë e Botërorit si legjendë.
Po Leo Messi? Edhe ai mori pjesë në Botërorin e parë në vitin 2006, kjo është edhe pjesëmarrja e pestë për të. Me përjashtim të faktit që argjentinasi dështoi në mënyrë sensacionale të shënonte gol në vitin 2010. Duke shënuar në debutimin e tij kundër Arabisë Saudite, ai e gjeti golin në edicionin e katërt të Kupës së Botës. Të pestë nuk do të ketë për të, ndaj në këtë drejtim do të jetë deficitar në krahasim me CR7.
Cristiano Ronaldo tundi rrjetën e portës së Ganës në Katar, bëhet lojtari i parë që shënon në 5 Kupa të Botës
2006 – 1 gol
2010 – 1 gol
2014 – 1 gol
2018 – 4 gola
2022 – 1 gol
Legjendë