Britania e Madhe- Media e njohur britanike, ‘Daily Mail’, ka publikuar sot pamje me atë që ajo e cilëson si “Luanin e Artë”, shqiptarin që merret me trafikimin e emigrantëve nga Franca në Angli.

Sipas raportimit që ka bërë prestigjozja, shqiptari fiton rreth 1 milion paund në javë duke dërguar emigrantë në Britani me gomone.

Shqiptari u tha gazetarëve, të paraqitur si klientë se mund t’i merrte për 4500 £ secili dhe premtoi se autoritetet britanike do t’u jepnin ushqim, batanije dhe gjithçka që u nevojiteshin përpara se t’i vendosnin në një hotel.

“Pas kësaj, ju mund të shkoni ku të doni”, tha ai.

Duke treguar se sa lehtësisht kontrabandistët e njerëzve mund t’i tejkalojnë autoritetet, gangsteri u kap nga policia franceze disa orë pasi e takuam – vetëm për t’u liruar mëngjesin tjetër për të rifilluar menjëherë operacionet e tij.

Ai është vetëm një nga shumë banda të cilat organizojnë trafikimin e njërëzve në Francën veriore, njëra prej të cilave ka 600 njerëz në një listë pritjeje për vende në varka të vogla.

Hetimi zbuloi gjithashtu se lufta e bandave, me përleshje të shpeshta me armë, është e përhapur mes trafikantëve rivalë që veprojnë si bosët e mafias që luftojnë për kontrollin e kampeve të paligjshme dhe nisjen e emigrantëve nga Franca drejt Anglisë.

Më shumë se 32,000 emigrantë kanë kaluar Kanalin Anglez me varka të vogla deri më tani këtë vit – më shumë se sa kanë kaluar gjatë gjithë vitit 2021.

Shqiptarët përbënin rreth 60 për qind të ardhjeve gjatë verës. Udhëtimet me varka të vogla janë shumë të rrezikshme dhe nganjëherë vdekjeprurëse, kujtojmë këtu një varkë me 27 emigrantë, përfshirë fëmijë , që u mbytën kur një gomone u rrëzua në Calais nëntorin e kaluar.

Vetëm javën e kaluar një gomone u përmbys në Calais me 57 emigrantë kryesisht shqiptarë në bord, duke përfshirë 17 fëmijë, dy prej të cilëve foshnja. Shumë prej tyre kishin nevojë për trajtim urgjent për hipotermi pasi u shpëtuan nga një anije patrullimi franceze.

Daily Mail zbuloi se industria e kontrabandës me njerëz po lulëzon pavarësisht nga rreziqet dhe përpjekjet për të penguar kalimet e paligjshme – duke përfshirë largimin e shpejtë të shqiptarëve, kërkesat për azil të të cilëve refuzohen dhe planin e ngecur për të dërguar emigrantë në Ruandë.

Place de la Gare në Dunkirk është bërë një stacion kryesor për ata që udhëtojnë për në Mbretërinë e Bashkuar.

Hotelet që rrethojnë sheshin janë mbushur me emigrantë që presin një varkë, ndërsa shoferët e taksive ofrojnë një shumë speciale prej 30 eurosh për t’ju çuar në një kamp ilegal. Rritja e emigrantëve shqiptarë do të thotë se disa shitës dhe kafene në Dunkirk tani hapen të dielën për t’u kujdesur për klientët shtesë.

Në një kafene me pamje nga stacioni i trenit gazetarët tanë u njohën me ‘Luanin e Artë’, i cili është me origjinë nga Vlora në jug të Shqipërisë.

Një tjetër emigrant nga Hasi i Shqipërisë, i cili ishte vetë në pritje të një varke për në Angli, i tha gazetarit tonë se: “Do të të gjejë sepse mbledh shqiptarë për Angli.

Ai e kalon gjithë kohën në shesh dhe i çon në hotelin ku qëndron.

Brenda pesë minutash, trafikanti kaloi pranë me një shok rrugës për në hotelin aty pranë Le Lion d’Or, ku ndodhet dhe nga i cili mori pseudonimin.

I veshur me pantallona të shkurtra dhe një bluzë Hugo Boss, ai u tha gazetarëve – të cilët po shtireshin si një çift i ri që shpresonin të shkonin në Angli, se ai mund të organizonte vende në një varkë për më pak se 9,000 £ kur moti të përmirësohej.

Ai tha: ‘Do t’ju njoftoj. Do të dërgoj një mesazh në momentin e parë që do ta marr vesh. I lutem Zotit që ta bëjë të mundur këtë. Moti është problemi. Unë dhe të tjerët nuk jemi problemi.’

Të nesërmen, tashmë i veshur me një bluzë Armani, u takua në një kafe në shesh. Pavarësisht rrezikut të madh për t’u fundosur, trafikanti këmbënguli se nuk kishte ‘asnjë shans’ që diçka të shkonte keq. “Le të themi se dikush mbytet në det, atëherë nuk ke problem vetëm me shtetin”, tha ai.

“Problemi kryesor është me familjen e atij personi. Askush nuk do t’ju falë për këtë.

“Njerëzit në varkë telefonojnë të afërmit e tyre dhe më pas ata telefonojnë policinë e Mbretërisë së Bashkuar për t’ju marrë ju. Sapo të kaloni ujin, ata do t’ju japin ushqim, gjithçka. Nëse njerëzit kanë të ftohtë, ata u japin atyre batanije.

“Më pas ju dërgojnë në një kamp. Do të kalojnë një ose dy ditë derisa të regjistrojnë dhe të shohin nëse je person i kërkuar dhe pastaj të lënë të lirë dhe të dërgojnë në hotel.

“Pas kësaj, ju mund të shkoni ku të doni. Ata mund t’ju mbajnë në një kamp deri në pesë ditë ose mund të jetë dy orë. Dje një familje është lënë e lirë pas dy orësh. Ti je me gruan tënde dhe besoj se do të të lënë të lirë shpejt”.

Trafikanti, i cili përdor një telefon celular të regjistruar në Spanjë, shkon e vjen nga Dunkirku për të shmangur zbulimin. Paratë për udhëtimet duhet t’i paguhen bashkëpunëtorit të tij në Londër, në vend që t’i dorëzohen në Francë, shpjegoi ai.

Pas disa minutash me gazetarët tanë, ai duhej të vazhdonte të fliste me disa nga klientët e tij të tjerë që ishin ulur në tryezën ngjitur në kafene.

Disa orë pas takimit ai u mor nga policia në një grumbullim të të gjithë shqiptarëve në kafene në atë kohë, përveç njërit që ishte në tualet. Por të nesërmen në mëngjes, "Luani i Artë" u rikthye dhe po punonte përsëri.

“Ata nuk mund të bëjnë asgjë sepse unë kam dokumentet për të qëndruar këtu”, tha ai në një mesazh në WhatsApp.