Vite përpara se Rusia të pushtonte Ukrainën, Oleksiy Savchenko ndihmoi në zhvillimin e një prej armëve më vdekjeprurëse dhe më të lira që përdoret tani nga mijëra pjesëtarë të shërbimit ushtarak ukrainas.

Në vitin 2014, ai ishte në mesin e protestuesve, mitingjeve disamujore në Kiev, të cilat përfundimisht hoqën presidentin pro-rus Viktor Janukoviç. Si hakmarrje, Moska aneksoi Krimenë dhe ndezi një luftë separatiste në juglindje të Ukrainës.

Kjo bëri që Savchenko, së bashku me aktivistë të të njëjtit mendim, të themelojnë një organizatë joqeveritare të quajtur "Army SOS". Grupi mblodhi para për të blerë xhupa anti plumb dhe pajisje të tjera ushtarake për ish-protestuesit që dolën vullnetarë për të luftuar separatistët, pavarësisht se ishin të papajisur dhe mezi të trajnuar.

Dhe ndërsa grupi dërgoi pajisjet në vijën e parë të frontit, vullnetarët dhe anëtarët e shërbimit kërkuan diçka që iu duhej më shumë. “Djema, na jepni harta, na duhen harta, kemi vetëm ato sovjetike të viteve 1980. Aty ku dikur kishte një fushë tani është një fshat apo një grumbull apartamentesh,” – kujton Savchenko duke i thënë ata.

Por në vend që të shtypte mijëra faqe prej letre, "Army SOS" punoi për një zgjidhje teknologjike. Ata i kërkuan një grupi zhvilluesish softuerësh në Kiev që të instalonin harta satelitore dhe të dhëna ushtarake ukrainase në tableta dhe smartfonë.

Sipas një anëtari të shërbimit ukrainas, i cili iu përgjigj risisë në vitin 2014, trupat filluan ta shihnin më mirë rrethinën e tyre dhe mjetet i lejuan ata të korrigjonin artilerinë më qartë dhe më saktë.

“A mund të shtoni një opsion për të matur distancën? A mund të fusim koordinatat? A mund të drejtojmë dhe llogarisim zjarrin e artilerisë?” – ishin kërkesat më të rëndësishme të trupave në terren, tha Savchenko për "Al Jazeera".