Putin do të bëjë udhëtimet e para jashtë vendit që nga fillimi i luftës në Ukrainë

Vladimir Putin do të vizitojë dy shtete të vogla ish-sovjetike në Azinë qendrore këtë javë që nis, njoftoi televizioni shtetëror rus të dielën, citon noa.al. Ky është udhëtimi i parë i njohur i liderit rus jashtë vendit që kur urdhëroi pushtimin e Ukrainës.

Pushtimi rus i 24 shkurtit ka vrarë mijëra njerëz, ka zhvendosur miliona të tjerë dhe ka çuar në sanksione të rënda financiare nga Perëndimi, të cilat Putin thotë se janë një arsye për të ndërtuar lidhje më të forta tregtare me fuqi të tjera si Kina, India dhe Irani.

Pavel Zarubin, korrespondenti i televizionit shtetëror Rossiya 1 në Kremlin, tha se Putin do të vizitojë Taxhikistanin dhe Turkmenistanin dhe më tej Bjellorusinë.

Në Dushanbe, Putin do të takohet me presidentin e Taxhikistanit, Imomali Rakhmon, një aleat i ngushtë rus dhe sundimtari më jetëgjatë i një shteti ish-sovjetik.

Në Ashgabat, Putini do të marrë pjesë në një samit të vendeve të Kaspikut, duke përfshirë liderët e Azerbajxhanit, Kazakistanit, Iranit dhe Turkmenistanit, tha Zarubin.

Putin gjithashtu planifikon të vizitojë qytetin e Grodnos në Bjellorusi më 30 qershor dhe 1 korrik për të marrë pjesë në një forum me presidentin bjellorus Alexander Lukashenko.

Udhëtimi i fundit i njohur i Putinit jashtë Rusisë ishte një vizitë në Pekin në fillim të shkurtit, ku ai dhe presidenti kinez Xi Jinping zbuluan një traktat miqësie "pa kufij" disa orë përpara se të dy të merrnin pjesë në ceremoninë e hapjes së Lojërave Olimpike Dimërore.

Rusia thotë se dërgoi trupa në Ukrainë më 24 shkurt për të shkatërruar aftësitë ushtarake të fqinjit të saj, me qëllim që të mbrojë Rusinë nga instalimi luftarak pranë kufijve të saj si vegla të Perëndimit kundër Moskës. Po ashtu Putini thotë se ky operacion që zgjat prej më shumë se 4 muajsh, po bëhet për të çrrënjosur nacionalistët dhe për të mbrojtur rusishtfolësit në rajonet lindore.

Ukraina e quan pushtimin një rrëmbim toke të stilit perandorak. /noa.al