Chelsea ka shpresa të mëdha se Armando Broja mund të jetë një nga yjet e ardhshëm, i dalë nga akademia e tij si klub, por po e vëzhgon nga larg, teksa pati një fillim të vështirë huazimi te Southampton. Kështu shkruan "Goal" për sulmuesin tonë të kombëtares. Dhe vazhdon:
Me dy gola të shënuar në dy ndeshjet e fundit, sulmuesit 20-vjeçar shqiptar i është dashur të durojë për të fituar minuta aktivizimi. Blutë zgjodhën ta dërgonin Brojën në një klub tjetër të Premier League në formë huazimi, pavarësisht tre golave në tri ndeshje gjatë përgatitjeve parasezonale. Trajneri Thomas Tuchel e mori nga Interi qendërsulmuesin Romelu Lukaku.
Oferta e huazimit nga Southampton u pranua shpejt, me shqiptarin e lindur në Angli që zëvendësoi Danny Ings (në largim) dhe duhej të rivalizonte Che Adams e Shane Long për titullar. Fillimisht, Broja ishte i kufizuar me aktivizimet. E nisi nga pankina edhe në “Carabao Cup”. Për më tepër, trajneri Hasenhuttl bëri thirrje që Broja të përshtatej, sepse sulmuesi luante një stil të ngjashëm loje si te Vitesse, sezonin e kaluar.
“Broja e nisi ngadalshëm te ne, por në tri javët e fundit është mbresëlënëse se sa shpejt po mëson. Ai dëshiron të bëjë sa më mirë”, – tha trajneri i Southampton në fillim të shtatorit. “Të shtunën e kam kuptuar pse nënshkruam me të dhe pse skautët donin që ta afronim. Dy javët e para po mendoja se çfarë mund të japë për ne si ekip dhe kisha dyshime, të jem i sinqertë.
Kam pasur disa biseda shumë serioze me Brojën, ku i kam thënë se çfarë dua të shoh prej tij në fushë dhe i kam kërkuar të mos jetë i ngadalshëm. Mendoj se duhej shtyrë pak dhe tani po lëviz në drejtimin që duhet. Ai po tregon cilësitë që ka, jemi të kënaqur deri në këtë moment”, – shtoi së fundi trajneri austriak, pasi 20-vjeçari shqiptar i dha fitore me golat e tij.
Broja nuk është i panjohur për vështirësitë, sepse ka luftuar fort në sezonin e parë me Chelsea U-18, përpara se të bëhej talenti më emocionues sulmues i akademisë së bluve. Ndodh shpesh që huazimi i parë në Premier League për një lojtar të ri mund të jetë i pakëndshëm. Reagimi i mëpasshëm i Brojës ndaj kritikave publike duhet vlerësuar.
Ai punoi shumë dhe ka nisur të shënojë në Premier League. Broja ka 7 gola me klubin dhe kombëtaren në 12 ndeshje të luajtura këtë sezon. Shumë prej këtyre ndeshjeve i ka nisur nga pankina, por ka një mesatare goli çdo 73 minuta. Duke folur pas golit të tij kundër Burnley, të shtunën, ishte e qartë se mendimi i trajnerit për sulmuesin shqiptar ka ndryshuar:
“Unë mendoj se Broja ka shpejtësi në lojën një kundër një, pasim dhe gjuajtje shumë të mirë kur është e nevojshme. Ai është një kërcënim për çdo mbrojtje kundërshtare, padyshim e ndihmon shumë skuadrën tonë. Ne e pamë dy herë Armando Brojën duke startuar dhe dy herë shënoi. Ai na jep disa cilësi që nuk i kishim deri më tani, jam shumë i lumtur që e kam në dispozicion”.
Nëse Broja mund të arrijë një numër dyshifror të golave dhe të fitojë minuta të rregullta në bregun jugor të Anglisë, ai mund të kthehet te Chelsea verën e ardhshme. Është gjithashtu e mundur që blutë ta tërheqin më shpejt; sepse ekziston një klauzolë për këtë, duke nisur qysh në janar.
Megjithatë, ashpërsia e trajnerit Hasenhuttl mund të jetë pikërisht ajo që Brojës i duhet për të arritur ambiciet e tij të larta. Natyrisht, shqiptari beson se mund të luajë futboll në ekipin e parë të klubit të fëmijërisë, Chelsea, në të ardhmen dhe kjo është arsyeja pse nënshkroi kontratë të re 5-vjeçare gjatë verës.
Duke folur për “Goal”, Broja pranoi se ambicia e tij ishte të bëhej Didier Drogba i ri: "Unë do të përpiqem ta kaloj Drogba. Mund të mos jetë e lehtë, por ky është mentaliteti im”.
Nuk do të jetë e lehtë, por Broja ka bërë gjithçka siç duhet deri më tani. Fatkeqësisht, nuk u përball dot me Chelsea mbrëmë për shkak të kushteve të marrëveshjes së tij të huazimit, por Tuchel duhet ta ketë pyetur kolegun e Southampton se si po përparon një nga xhevahirët e akademisë blu.