Një i moshuar në Selanik, Greqi, është mashtruar përmes telefonit dhe i janë përlarë 25 mijë euro pasi personi që e mori, u shtir të ishte djali dhe i tha se kishte vrarë në aksident në fëmijë shqiptar dhe duhet të paguante 25 mijë euro që mos përfundonte në burg.

Gjithçka filloi një mëngjes tetori, pak ditë më parë, kur burri 83 vjeç u zgjua nga një telefonatë nga dikush që pretendonte se ishte djali i tij dhe po qante, raporton noa.al.

I moshuari rrëfeu në radion lokale gjithçka si ndodhi.

"Më ra telefoni dhe kur e ngrita dëgjova një zë që vetëm qante. Më tha se ishte djali. Ishte i lemerisur. Më tregoi se kishte bërë aksident ku kishte vdekur një fëmijë i huaj, shqiptar".

"Kalova me të kuqe dhe godita një vajzë të vogël. Erdhi ambulanca e mori, por duke shkuar në spital fëmija vdiq. Unë jam në polici, këtu për far, një polic është miku im dhe ai do që të më ndihmojë”, tha zëri në telefon që supozohej të ishte djali i tij.

I moshuari vijon rrëfimin: "Ai që më tha se ishte im bir dhe unë e besova, më kaloi dhe njeriun tjetër që tha se ishte polici që do ta ndihmonte. Ai medemek polici, më tha se donte ta ndihmonte por kishte frikë se humbte punën.

Dhe më tha se fëmija ka vdekur. Kurse tha se e kishte bindur të atin, shqiptar, që do të shkojë ta varrosë në Shqipëri, por do pak para për të tërhequr padinë dhe duhen shpejt, sepse nëse vjen prokurori, djali juaj do të hajë 10 vjet burg dhe do të kërkojë 100 mijë euro”, më tha "polici".

Në këtë moment, – tregon 83 vjeçari, e pyeta se sa para duhen dhe më tha, 30 mijë euro.

“Isha i bindur se personi me të cilin fola ishte djali im. Gjithçka që mund të mendoja ishte se djali im po shkatërronte jetën, po humbte punën, duhet të ishte i shkatërruar nga aksidenti që kishte bërë.

I moshuari vijon të tregojë se personat që e morën në telefon thanë se ai nuk duhet të fliste me njeri për këtë bisedë.

83-vjeçari ka shkuar me nxitim në bankë dhe ka tërhequr 15 mijë euro nga llogaria e tij, duke thënë se po blinte një pronë.

Polici i rremë e udhëzon se ku t’i lërë paratë dhe në rrugën Giannitson ku ishte takimi, del një 20-vjeçar të cilit i ka dhënë 15 mijë euro. I riu i ka kërkuar edhe 10 mijë euro shtesë dhe ai ia dha.

Ditën tjetër, i moshuari kuptoi se nuk kishte folur me djalin një ditë më parë dhe mësoi se ishte mashtruar. Në intervistën radiofonike ai bëri thirrje që njerëzit të bëjnë kujdes sepse mashtrimet po gëlojnë gjithandej.

Hetimi nxori se numri i telefonit që bëri thirrjen ishte bullgar.