Një burrë i dyshuar për organizimin e fluturimit që transportoi futbollistin Emiliano Sala, i cili vdiq me rrëzimin e avionit më 2019, u gjykua dhe u deklarua fajtor këtë të hënë (18 tetor) në Cardiff, kryeqytetin e Uellsit.

David Henderson, 66 vjeç, pranoi disa nga akuzat me të cilat përballet, përfshirë mënyrën e pamatur ose të pakujdesshme me të cilën veproi, gjë që mund të ketë rrezikuar aeroplanin në të cilin ish-futbollisti Sala po udhëtonte.

Ai akuzohet gjithashtu për transport të një pasagjeri pa autorizim të vlefshëm. Henderson u deklarua fajtor për akuzën e fundit, e cila nuk do të debatohet gjatë gjykimit të mëtejshëm. Aeroplani i vogël privat, në bordin e të cilit ishin futbollisti argjentinas dhe piloti 28-vjeçar, David Ibbotson, u rrëzua në kanalin anglez më 21 janar 2019.

Sulmuesi i FC Nantes po i bashkohej Cardiff City, ku po transferohej për 17 milionë euro. Trupi i lojtarit, zhdukja e të cilit kishte tronditur botën e futbollit, u gjet brenda mjetit fluturues më shumë se dy javë pas aksidentit, në një thellësi ujore prej 67 metrash.

Në raportin përfundimtar, të publikuar në mars 2020, Byroja Britanike e Hetimit të Aksidenteve të Aviacionit (AAIB) vlerësoi se piloti humbi kontrollin e avionit, një “Piper PA-46 Malibu”, gjatë një manovre të kryer me shpejtësi shumë të madhe.

Me siguri, ai kishte për qëllim shmangien e motit të keq në mënyrë që të ishte në gjendje të vazhdonte fluturimin. Avioni ishte me shpejtësi prej 270 milje në orë (435 km/orë) në kohën e goditjes me ujin, sipas AAIB, duke përjashtuar çdo shpresë për mbijetesë.

Hetuesit, gjithashtu besojnë se piloti ishte helmuar me monoksid karboni nga sistemi i shkarkimit të motorit të avionit. Po kështu, ata gjithashtu theksuan se fluturimi nuk u krye në kushte që përputhen me rregullat e fluturimeve komerciale.

Piloti nuk ishte i licencuar për të fluturuar me këtë lloj avionic, sidomos natën dhe në kushte të vështira moti. Fluturimi u caktua nga piloti britanik, David Henderson, me kërkesë të ndërmjetësit Willie McKay dhe djalit të tij Mark, agjenti i caktuar nga FC Nantes për të kryer transferimin e Sala.